भांगरभूंय | प्रतिनिधी
पणजी : केंद्र सरकाराच्या डीडीयूजीकेवाय २.० हे येवजणे खाला राज्यांत १२ प्रशिक्षण केंद्रां चालीक लायल्यांत. हातूंत १२०० विद्यार्थ्यांनी नोंदणी केल्या. फुडल्या दोन अर्थीक वर्सांत १२ हजार विद्यार्थ्यांक प्रशिक्षण दिवपाचें ध्येय आसा. हे येवजणेची प्रभावी अंमलबजावणी करपाक गोंय देशांत मुखार आशिल्ल्याचें मुख्यमंत्री डॉ. प्रमोद सावंत हांणी सांगलें. मंगळारा लोकभवन हांगा आयोजीत केल्ले कार्यावळींत ते उलयताले. ह्या वेळार ग्रामीण विकास खात्याचे संचालक डॉ. संतोष तिवारी, प्रेमराज शिरोडकार आनी हेर अधिकारी हाजीर आशिल्ले.
मुख्यमंत्र्यांनी सांगलें, डीडीयूजीकेवाय २.० हे येवजणे खाला राज्याच्या गांवगिर्या वाठारांतल्या तरणाट्यांक तांचे तांकीची उदरगत आनी रोजगार संद उपलब्ध करून दितात. येवजणे प्रमाण रोजगार संदीचें ध्येय ७० टक्के पुराय करपा खातीर आमी यत्न करतात.
युवा शक्तीची उदगत करपा खातीर आमचें सरकार कटिबद्ध आसा. आत्मनिर्भर भारताचें सपन पुराय करपा खातीर कुशळटाय उदगत गरजेची. फाटलीं कांय वर्सां तरणाट्यां खातीर ५०९ कोटींचें रीण मंजूर केलां. अर्थीक समस्या विद्यार्थ्यांच्या बुद्धिमत्ते आड येवचें न्हय हो आमचो हेतू आसा.
तांणी मुखार म्हणलें, राज्यांतल्या १० आयटीआयनी परंपरीक अभ्यासक्रमां सयत आधुनीक अभ्यासक्रमूय शिकयतात. उद्देग क्षेत्राची गरज पळोवन ड्रोन तंत्रज्ञाना सयत हेर नवे अभ्यासक्रम हाडल्यात. तरणाट्यांनी रोजगार दिवपी उद्देजक करचे खातीर आमी यत्न करतात. सरकाराच्या यत्नांक लागून गोंय कुशळटाय उदरगत मळार अग्रेसर जातली अशी आमकां खात्री आसा. येवजणे खाला गोंयच्या विद्यार्थ्यांनक प्रशिक्षण, वाहन भत्तो, रावपाचो खर्च , रोजगार संदी दितात. खंयचोच पात्र तरणाटो फाटीं उरचो ना, हाची आमी जतनाय घेतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
