भांगरभूंय | प्रतिनिधी
म्हापशें: बर्च क्लबांत सोरो विक्री अकबारी खात्याचो उत्पादन शुल्क परवानो मेळोवपा खातीर कांदोळे मुळाव्या भलायकी केंद्राचा बनावट भलायकी दाखलो तयार केल्ल्या प्रकरणांत म्हापशें पुलिसांनी क्लबाचे धनी गौरव लुथरा आनी सौरभ लुथरा हांकां अटक केली.
फाटल्या शुक्रारा म्हापशें अतिरिक्त जिल्लो आनी सत्र न्यायालयान दोगूय दुबावितांचो अटकपूर्व जामीन अर्ज भायर मारिल्लो. हाका लागून तांचे अटकेचो मार्ग मेकळो जाल्लो. सोमारा ३० मार्चाक म्हापशें पुलिसांनी दुबावीत लुथरा भावांक अटक करपाची परवानगी न्यायालयान दिली तेन्ना दनपरां तांकां पुलिसांनी कोलवाळ बंदखणींतल्यान ताब्यांत घीतले आनी अटक केली.
मजगतीं, कांदोळी मुळाव्या भलायकी केंद्राचे अधिकारी डॉ. रोशन नाझारेथ हांणी म्हापशें पुलिशेंत फाटल्या ता. १७ डिसेंबर २०२५ दिसा ह्या बनावट एनओसी विशीं कागाळ दाखल केल्ली. हो प्रकार १३ डिसेंबर पयलीं अकबारी खात्याच्या म्हापशें निरीक्षक कार्यालयांत घडिल्लो. बर्च उजो घडणूक प्रकरणाच्या पुलीस चवकशे वेळार दुबावितांचो हा बनावट आनी फटींगपणाचो प्रकार उक्तडार आयलो.
उपरांत जीएस हॉस्पिलिटी एलएलपी हे कंपनी सयत कंपनीचे अधिकृत धनी आशिल्ले सौरभ लुथरा, गौरव लुथरा आनी अजय गुप्ता हांचे आड भारतीय न्याय संहितेच्या ३३२(२), ३३६(३), ३३८, ३४०(२), ३१८(४) आनी ३(५) कलमान्वये गुन्यांव नोंद केल्लो.
मजगतीं, साकवाडी हडफडेंच्या सर्वे क्रमांक १५९/० तल्या घर नंबर ५०२/१त चलपी जीएस हॉस्पिलिटी एलएलपी कंपनीच्या आस्थापना खातीर उत्पादन शुल्क परवानो मेळोवपाच्या हेतान दुबावीत आरोपींनी समान हेतान मुद्दम आनी अप्रमाणिकपणान कांदोळी मुळाव्या भलायकी केंद्राचें नाहरकत प्रमाणपत्र (एनओसी) तयार केलें. जातूंत दुबावितांनी फिर्यादींची नक्कल करून सय बनावट केली आनी रजिस्टरांत बनावट नोंदीचो वापर केलो.
हो बनावट दाखलो खरो आशिल्ल्याचें दाखोवन तो उत्पादन शुल्क खात्याकडेन सादर केलो. जाका लागून उत्पादन शुल्क परवान्या खातीर कागदोपत्री ेव्हार पुराय करपाक मेळटा आनी दुबावीत आरोपी हे हो उत्पादन शुल्क परवानो मेळोवपाक येसस्वी जाले. जाका लागून फिर्यादी तशेंच अकबारी अधिकार्यांची फसवणूक केल्ल्याच्या आरोपा खाला म्हापशें पुलिसांनी बनावटगिरी आनी फटींगपणाचो गुन्यांव नोंद केल्लो. ह्या गुन्यांवांत अटक जावची न्हय म्हणून दुबावितांनी न्यायालयांत धांव घेतिल्ली. फुडलो तपास पुलीस उपनिरीक्षक यशवंत मांद्रेंकार हे करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
