भांगरभूंय | प्रतिनिधी
म्हापशें: थिये सोर्याचे घुंवळेंत गाडी चलयिल्ल्यान जाल्ल्या भिरांकूळ अपघातांत दिव्यांश सिंग (रा. वाराणशी, उत्तर प्रदेश) ह्या दुचाकी चालकाक मरण आयलें. जाल्यार सचिन चाचिया (रा. हरियाणा) हो तरणाटो गंभीर जखमी जाला. ताचे जिल्लो हॉस्पिटलांत उपचार सुरू आसात. कोलवाळे पुलिसांनी गाडी चालक दुबावीत यल्लाप्पा राऊत (रा. पेडें, म्हापशें) हाका ताब्यांत घेतला.
हो अपघात आयज दनपरां सुमार १.३० वरांचेर थियेच्या हुंडाई शो रूमा लागसार घडलो. चुकीचे दिकेन वचून जीए ०३ एएफ ९८३० नंबराचे गाडयेन मुखारच्यान येवपी दुचाकींक नेटान धपको दिलो. पयलीं धपको बशिल्ल्या दुचाकीवेल्या तरणाट्याक जाग्यारूच मरण आयलें. जाल्यार सचिन हो गंभीर जखमी जालो. तशेंच दुसरे दुचाकीवेलेय जखमी जाले. जखमी सचिन चाचिया हाचेर म्हापशें जिल्लो हॉस्पिटलांत उपचार सुरु आसात.
ह्या अपघाताक कारण थारपी गाडी चालक दुबावीत यलाप्पा राऊत हो सोर्याचे घुंवळेंत आशिल्लो. पुलिसांनी ताका ताब्यांत घेवन वैजकी उपचारां खातीर जिल्लो हॉस्पिटलांत दाखल केलो.
ह्या अपघाताचो पंचनामो पुलीस उपनिरीक्षक रामचंद्र साटेलकार आनी सहाय्यक उपनिरीक्षक अनिल पिळगांवकार हांणी केलो. फुडलो तपास पुलीस निरीक्षक संजित कांदोळकार हांच्या मार्गदशनाखाला सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
