भांगरभूंय | प्रतिनिधी
सरकारी निर्णयाचेर विरोधी पक्ष, संघटणांची टिका
पणजीः प्रतिबंधात्मक आदेश जारी करून मिराबागच्या थळाव्यांक आझाद मैदानाचेर आंदोलन आडावपाच्या निर्णयाचो विरोधी पक्षाचे फुडारी, संघटणांनी आनी समाज वावुरप्यांनी निशेध केलो. हो प्रतिबंधात्मक आदेश लोकशाहेची हत्या जावन आसा, असो आरोप ह्या वेळार तांणी केलो.
सोमारा सकाळीं मिराबागचे लोक पणजे आझाद मैदानाचेर बंधार्या आड आंदोलन सुरू करपाचे आशिल्ले. मात हे फाटभूंयेर उत्तर गोंय जिल्लोधिकारी जमाव बंदी आड बीएनएस कलम १६३ खाला प्रतिबंधात्मक आदेश जारी केलो. ह्या वेळार आझाद मैदानाचे सरभोंवतणी व्हडा प्रमाणांत पुलीस फौज हजर आशिल्ली आनी आझाद मैदानाच्यो सगल्यो गेटी बंद करून दवरिल्ल्यो.
ह्या आदेशाक लागून मिराबागच्या थळाव्यांक तेंको दिवपाक आयिल्ले विरोधी पक्षांचे फुडारी, संघटणा आनी समाज वावुरप्यांनी खर तिडक उक्तायली आनी ह्या निर्णयाक लागून तांणी सरकारा आड तिडक उक्तायली.
उत्तर गोंय जिल्लोधिकार्यान ६ एप्रिल २०१७त आदेश काडून उत्तर गोंयच्यो दोन सुवातो कांपाल परेड ग्रावंड आनी आझाद मैदान आंदोलना खातीर अधिसुचीत केल्यात. मात आतां प्रतिबंधात्मक आदेश काडून जिल्लोधिकार्यान २०१७त काडिल्ले आदेश स्वता मोडले, असो आरोप गोवा फॉरर्वडचे उपाध्यक्ष दुर्गादास कामत हांणी केलो.
वेंचणूक ही दक्षीण गोंयच्या फोंडें मतदारसंघांत आसा आनी आचारसंहीता ही दक्षीण गोंयां पुरती मर्यादीत आसा. मात जिल्लोधिकार्यान कसलेंच कारण नासतना आचारसहींतेच्या नांवान प्रतिबंधात्मक आदेश काडप सामकें चुकीचें आसा आनी ही लोकशायेची हत्या जावन आसा. ह्या आंदोलनाक तेंको दिवपा खातीर भरपूर लोक आयिल्ले, मात प्रतिबंधात्मक आदेशाक लागून खुपशे जाण परत गेले, अशें कामत हांणी म्हणलें.
जेन्ना मिराबागचे आंदोलक मुख्यमंत्री डॉ. प्रमोद सांवत हांची भेट घेतले उपरांत मुख्यमंत्र्यान हो मिराबाग बंधार्याचो प्रस्ताव फाटीं घेवपाचें आस्वासन दिलां अशें भाजपाचे प्रदेशाध्यक्ष दामु नयक हांणी आपल्या तोंडातल्यान सांगलां. जर तांकां हें उतर दिता जाल्यार तांचे भावने कडेन खेळटा हे विशींचो आदेश जारी करपाक जाय आसलो, अशें कामत हांणी सांगलें.
खंयचेंय आंदोलन जेन्ना आझाद मैदानाचेर पावता तातूंतली सुमार ९० टक्के आंदोलनां येसस्वी जाल्यांत. हें आझाद मैदानाचे व्हडपण आसा, अशें गाकुवेधचे अध्यक्ष गोविंद शिरोडकार हांणी सांगलें.
डॉ. प्रमोद सावंताक खबर आसा की मिराबागचे लोक जर आयज आझाद मैदानाचेर पावले जाल्यार आंदोलनांची खरसाण वाडून परिस्थिती नियंत्रणा भायर वयतली. देखून सरकारान लोकशायेची गळो आवळून, मिराबगचे लोक हांगासर पावचे न्हय म्हण चारय वटेन नाकाबंदी केल्ली आसा, असो आरोप शिरोडकार हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
