भांगरभूंय | प्रतिनिधी
पणजी : दाबोळेच्या प्रभु व्हायोलेटा निवासी संकुलांत दुशीत उदका पुरवणा प्रकरणाची राज्य मानवाधिकार आयोगान दखल घेतल्या. हे विशीं हांगच्या लोकांनी आयोगाकडेन कागाळ केल्ली. आयोगान कागाळ दाखल करून घेवन ह्या प्रकरणांत पेय जल खात्याचे मुखेल अभियंता, उदकास्रोत खात्याचे सहाय्यक अभियंता आनी प्रभू रिअलटर्स हांकां नोटीस धाडल्या. तशेंच हे विशीं १० एप्रिलाक जावपी सुनावणेक हाजीर रावपाचे आदेशूय दिल्यात.
ह्यान पयलीं प्रभु व्हायोलेटा निवासी संकुलांत दिवपी पिवपाच्या उदकांत घाणयारें उदक मिसळिल्लें. हें दुशीत उदक पियेवन १५० परस चड जाणांक अतिसार, ओंकारी, अशक्तपणा असो त्रास जावपाक लागिल्लो. हे विशीं पिवपाच्या उदकांत प्रक्रिया करूंक नाशिल्लें घाणयारें उदक मिसळिल्ल्यान हो प्रकार घडिल्ल्याचो आरोप थळाव्यांनी केल्लो. मात बिल्डर प्रभू हांणी हो आरोप भायर मारिल्लो. दक्षीण गोंय जिल्लोधिकारी एग्ना क्लिटस हांणी प्रभावीत वाठारांत शुद्ध पाणी पुरवण करपाचे आदेश पेयजल खात्याक दिल्ले.
उपरांत सिरिल फर्नांडिस हांणी हांगा भौशीक भलायकेचो प्रस्न हाजीर जाल्ल्याचें सांगून मानवाधिकार आयोगाक हस्तक्षेप करपाची मागणी केल्ली. हो पस्र्न फकत त्या संकुलापुरतो मर्यादीत ना. त्या वाठारांत हेर सुवातांचेरूय अशे दुयेंती मेळिल्ल्याचें तांणी सांगलें. दुयेतींक तपासणी आनी उपचार करप, ह्या प्रकरणांतल्या दोशींचेर कारवाय करप, फुडाराक अशी समस्या निर्माण जावची न्हय म्हूण कायमची उपाय येवजण करप, अश्योय मागण्यो तांणी केल्ल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
