भांगरभूंय | प्रतिनिधी
पणजी : चिंबलाचे ग्रामसभेंत आयज नवो वाद निर्माण जालो. जे सुवातेर ही ग्रामसभा जाली ती सुवात आपली खासगी मालमत्ता आसूनय प्रशासनान कसलीच पयलीं परवानगी घेनासतना तिचो वापर केल्ल्याचोआरोप जमन धनयान केला. प्रकाराक लागून जमीन धनयान सरपंच आनी संबंदीत अधिकार्यांक धारेर धरून प्रशासकीय कारभाराचेर प्रस्न केलो.
मेळिल्ले म्हायती प्रमाण, आयतारा चिंबल पंचायत वाठारांत ग्रामसभा जाली. पूण हे बसके खातीर वेंचून काडिल्ली सुवात खाजगी मालकीची आशिल्ली. बसकेच्या सुवातेर जमनीचो धनी हाजीर आशिल्लो आनी ताणें ह्या जमनीचे मालकी विशीं अधिकार्यां कडेन प्रस्न विचारले. ही आमची खाजगी मालमत्ता आनी परवानगी नासतना वापरप कायदेशीर रितीन चुकीचें अशें तांणी सांगलें.
ग्रामसभा सारक्या भौशीक उपक्रमांक तांच्या कुटुंबान सदांच सहकार्य केलां अशें जमनीच्या मालकान फुडें स्पश्ट केलें. पूण लोकशाय आनी शिश्टाचाराचो उण्यांत उणो भाग म्हूण प्रशासनान जागो वापरचे पयलीं मालकाची संमती घेवपाक जाय आशिल्ली. संमती नासतना अशे तरेन बसका घेवप म्हणल्यार खाजगी मालमत्तेच्या हक्कांचो भंग अशें तांणी सांगलें.
ह्या अनपेक्षीत वादाक लागून कांय काळासावन ग्रामसभेंत तणावाचें वातावरण निर्माण जाल्लें. प्रशासनान अजून अधिकृत प्रतिसाद दिवंक ना, पूण खाजगी जमनीचेर भौशीक बसका घेतना अश्यो चुको,पंचायत प्रशासनाच्या कार्यक्षमतेचेर टिका जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
