भांगरभूंय | प्रतिनिधी
पणजी: कामाक्षी कॉलेज ऑफ कलिनरी आर्ट्स (केसीसीए) हांगचे दोन विद्यार्थी इंडीयास्किल्स राष्ट्रीय स्तर सर्त २०२५-२६त वांटो घेतले. जोलन फर्नांडीस आनी रियोना बर्नाडेट कोएल्हो हांणी अंदूंच्या वेस्टर्न झोनल फायनलींत अनुक्रमान भांगरा आनी रुप्या पदकां मेळोवन राष्ट्रीय सर्ती खातीर आपली निवड सुरक्षीत केल्या. राष्ट्रीय सर्त ओडिशाच्या भुवनेश्वरांतल्या सी व्ही रमन ग्लोबल युनिव्हर्सिटींत २९ मार्च ते १ एप्रील मेरेन जातली.
राष्ट्रीय सर्ती पयलीं विद्यार्थ्यांक मुंबय नामनेचे पेस्ट्री शेफ युरेका हांचे कडल्यान विशेश प्रशिक्षण दिलें. हे सर्तींत विद्यार्थी शुगर आर्ट्स, चॉकलेट वर्क आनी विवीध तरेच्यो पेस्ट्री करपा सारकिल्ल्या विशेश कुशळटायेंत सर्त करतले.
प्रादेशीक सर्तींत येस मेळ्ळे उपरांत राष्ट्रीय सर्ती विशीं उमेद उक्तायतना जोलन फर्नांडीस हांणी, इंडीयास्किल्सांत वांटेकार जावपी ही म्हजे खातीर अभिमानाची आनी उमेदीची गजाल. मुंबयत प्रशिक्षण म्हजे खातीर खूब उपेगी थारलें. हाका लागून म्हज्या तंत्रांत सुधारणां जाली आनी सर्तीचे निकश आनीक बरे तरेन समजले.
रियोना कोएल्हो हांणी, गोंय आनी म्हजी कॉलेज केसीसीएचें प्रतिनिधित्व करतना म्हाका अभिमान दिसता आनी हांव म्हजी कुशळटाय आनी मेहनतीचेर खर यत्न करतलों.
कामाक्षी ग्रुपचे संस्थापक परिक्षीत पै फोंडेकार हांणी, आमचे विद्यार्थी राष्ट्रीय पांवड्यार सर्त करतात. ही फकत एक उपलब्धी न्हय, फुडाराचे उद्देगीक फुडारी करपाचे दिकेन मारिल्लें एक पावल.
राष्ट्रीय पांवड्यावेले जैतिवंत अंदूं सप्टेंबरांत शांघाय हांग ाजावपी वर्ल्डस्किल्स सर्तींत भारताचें प्रतिनिधित्व करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
