भांगरभूंय | प्रतिनिधी
अमेरिकेचे अॅक्शन स्टार चक नॉरिस हांकां हाँगकाँगचो मार्शल आर्ट स्टार ब्रूसली हांणी 1972 सालांत तांच्या “धी वे ऑफ धी ड्रॅगन” ह्या फिल्मांत खलनायकाची भुमिका साकारपाची ऑफर दिल्ली, तेन्ना नॉरिस हांणी ली हांकां प्रस्न केलो, “तुका कराटे वर्ल्ड चॅम्पियन फायटराक हारोवपाचो आसा फिल्मांत?” हाचेर ली हांणी आत्मविश्वासान जाप दिली, “ना. म्हाका फिल्मांत एका कराटेच्या संवसारीक वस्तादाक मारपाचो आसा.” ब्रूस ली हांचो हो आत्मविश्वास पळोवन चक नॉरिस प्रभावीत जालो आनी ली हाचे कडल्यान कथानकाचे निमाणे पावंड्याचेर हाणामारीचे दृश्यांत आपूण मरता अशें दृश्य आसुनय नॉरिस हांणी ही खलनायकी बाजाची कराटे चॅम्पियनाची भुमिका स्विकारली. सिनेमा संसारांत हिट जालो आनी तांचे भितर जाल्ले हाणामारीचें दृश्य आयजय “सार्वकालीन उत्कृश्ट मार्शल आर्ट फायटिंग सीन” म्हूण फामाद आसा.
हॉलिवूड सिनेमांत “एक्शन हिरो” अशी प्रतिमा आशिल्ले फिल्म आनी टीव्ही अभिनेते, मार्शल आर्ट चॅम्पियन तशेंच चित्रपट कलाकारांक कराटे तशेंच पुलीस कर्मचारी आनी नागरिकांक स्वसंरक्षणाचे धडे दिल्ले कराटे प्रशिक्षक कार्लोस रे उर्फ चक नॉरिस हे हालींच संसाराक अंतरले. “वे ऑफ धी ड्रॅगन”, “ब्रेकर ब्रेकर”, गुड गायज वेअर ब्लॅक, धी ऑक्टागॉन, एन आय फॉर एन आय, सायलेंट रेज, लोन वूल्फ मेक्वेड, मिसिंग इन ऍक्शन, डेल्टा फोर्स सारकिल्ले फिल्मांनी तांणी 70 आनी 80 चे दशक गाजयिल्लें. अमेरिकेच्या कोलंबिया ब्रॉडकास्टिंग सिस्टमचे अंतर्गत तांची मुखेल भुमिका आशिल्ली “वॉकर, टेक्सास रेंजर” (1993-2001) ही तांचे अभिनय कारकीर्दींतली सगल्यांत व्हड काळ चलपी दूरदर्शन माळ थारली. 2006 मेरेन तांणी अॅक्शन चित्रपटांनी ल्हान व्हड, सोयरो कलाकार अशो भूमिका करप सुरूच दवरलें. तांची निमाणी मुखेल भुमिका आशिल्लो “धी एक्सपेंडेबल्स” माळेंतलो ” धी एक्सपेंडेबल्स भाग 2″ हो तांचो सिनेमा कारकिर्दीतलो निमाणो सिनेमा आशिल्लो. 2012 वर्सा आयिल्ल्या ह्या देमारपटात तांणी सिल्वेस्टर स्टेलॉन, जेसन स्टेथम आनी ब्रुस विलिस सारकिल्ले व्हड अॅक्शन अभिनेत्यांबराबर स्क्रीन शेयर केल्ली.
अमेरिकेच्या हवाई दळांत अॅर पोलिसमन म्हूण 1958 ते 1962 ह्या काळात नोकरी केल्ले कार्लोस हांकां कोरिया हांगां बदली आसतना “चक” हें नांव पडलें, जें तांणी फुडेंय कायम दवरलें. पयले श्रेणीचो हवाई दल अधिकारी म्हूण सेवामुक्त जातकच तांणी कॅलिफोर्निया हांगां पुलीस अधिकारी म्हूण अर्ज भरता आसतनाच तांणी मार्शल आर्ट स्टुडिओ सुरू केलो आनी कराटे आनी हेर मार्शल आर्टचे सर्तींनी वांटो घेतलो. अखिल अमेरिकन कराटे सर्त आनी वेवसायीक मध्यम वजनी गटाची अमेरिकन कराटे चॅम्पियनशीप सर्त ताणी सलग स वर्सा जिकली. हॉलिवूडाचे अॅक्शन मार्शल आर्ट सुपरस्टार ब्रूस ली हांचे कडेन वळख जातकीच तांचे कडल्यान एका फिल्मांत कराटे चॅम्पियन आशिल्लो खलनायक साकारपाची ऑफर तांणी स्विकारली. अमेरिकेंत “रिटर्न ऑफ धी ड्रॅगन” ह्या नांवान हो सिनेमा 1972 सालात प्रदर्शित जालो आनी सुपरहिट थारले उपरांत नोरीस हांका जायते देमारपटांचे प्रस्ताव येवपाक लागले. तांचे फिल्म पळयले उपरांत हॉलिवूड सुपरस्टार आनी नॉरिस हांचे कडेन कराटे प्रशिक्षण घेवपाक आयिल्ले सिने नट स्टीव्ह मॅकक्वीन हांणी नॉरिस हांकां सिनेमांत मेळपी कामां मात्शीं गंभीरतायेन घेवंची, असो सल्लो दिलो. मॅकक्वीन हांणी नॉरिस हांची अभिनय क्षमता हेरली वा वळखली आनी मेट्रो गोल्डविन मेयर (एमजीएम ) हे हॉलीवूडातले व्हड नामनेचे स्टुडिओंत अभिनयाचे धडे घेवपाक उर्बा दिली. नॉरिस हांकां कमकुवत पटकथा आनी संवाद आशिल्ली जायती मार्शल आर्ट फिल्मांचे प्रस्ताव मेळटाले पुण नॉरिस फट्ट करून खयच्याय चित्रपटाक रोखडोच हय म्हणनाशिल्ले. कथानक समाधानकारक दिसलें आनी हाणामारीचीं दृश्यां कथानकाक भावनिक पद्धतीत योग्य आसा अशी दिसली जाल्यारच ते फिल्मांत काम करपाची इत्सा दाखयताले. सुरूवातीची काय फिल्मां, निर्माते आनी वितरक मेळनाशिल्ले म्हूण स्वता फुडाकार घेवन ताणी प्रदर्शित करपाक गुंतवणूक केल्ली.
भारतांत तामिळ सिनेमाचे सुपरस्टार रजनीकांत हांचे सिनेमांतल्या पात्रांक लागून “रजनीकांत जोक्स” हो विनोद करपाचो प्रकार मीम्स आनी हेर पॉप कल्चर मनरिजवण पद्दतींत फामाद आसा. असोच कायसो प्रकार चक नॉरिस हांचे विशीं “चक नॉरिस फॅक्ट्स” हे स्वरूपांत जाल्लो. हे विनोद इंटरनॅट मिम्साचे स्वरूपांत 2005 चे दरम्यान उजवाडाक येवपाक लागले. आपल्याचेर जावपी विनोद हातुंत राग धरीनासतना नॉरिस हांणी ते खिलाडू वृत्तीन घेतलें आनी तांणी स्वता तांचेर एक पुस्तक बरोवन उजवाडायलें. तांणी साहित्य निर्मिती आनी विंगड विंगड विशयांचेर पुस्तकां बरोवपाचेर भर दिलो. फिटनेस, व्यायामप्रकार, मार्शल आर्ट, तत्वज्ञान, रूढीवादी परंपरागत राजकारण, कॅथोलिक पंथाचेर आदारिल्ल्या पाश्चात्य काल्पनिक कथांचे साहित्य, व्यक्तिचित्रण आनी स्वयंसहाय्य वावरांच्यो युक्ती अशें तांचें लिखाण वा पुस्तकांचे विशय आसताले. नॉरिस हे कॅथोलिक धर्माचो पाळो दिवपाक उर्बा दिताले. तशेच कॅथोलिक पंथाचेर आदारिल्ली पुस्तकां बरोवपाचे वावरात आनी उपक्रमांत तांणी वांटो घेतिल्लो. कुटुंब वेवस्था, सामाजीक जापसालदारकी, नैतिक मूल्यां, तत्वां, नैतिक जबाबदारी आनी हांचेर तांचो भर आशिल्लो.
परंपरावादी आनी रूढीवादी विचारसरणीचे आशिल्ल्यान ते अमेरिकेच्या उजवे विचारसरणीचे रिपब्लिकन पक्षाक तेंको दिताले. अमेरिकेचे राष्ट्राध्यक्ष रोनाल्ड रीगन हांचे ते कट्टर समर्थक आनी पुराय वा खर उजवे विचारसरणीक उर्बा दिवपी “वर्ल्ड नेट डेली” हे वॅबसायटीचेर ते नेमान बरोवप वा स्तंभलेखन करताले. अमेरिकेंतल्या तरणाटे चले आनी चलयां हांकां सोरो आनी तंबाखूच्या वेसनांतल्यान सोडोवपाक लागून आनी ड्रग्साचे विळख्या सावन पयस दवरपाक लागून तांणी कराटे, ज्युडो, ज्यू जित्सू आनी हेर मार्शल आर्ट तशेंच फिटनेस हांचे वर्ग अमेरिकेंत सुरू केल्ले.
आपले अॅक्शन हिरो वा महानायक प्रतिमेचो फायदो घेवन अमेरिकेचे सैनिकांक प्रोत्साहन दिवपाक नॉरिस 2007 सालांत इराक हांगा अमेरिकन सैन्याक भेट दिवपाक गेल्ले. ल्हान भुरग्यांक लागून निधी
उभारपाक तांणी समाजकार्य केले.
भारतांत विजय अमृतराज फावंडेशन, कर्नाटकांतले अंध भुरग्यांचे विद्यालय, एचआयव्ही एड्स रोगाक लागून मरणाचे देगेर आशिल्ले रुग्णांचे दिल्लींतले जतानाय गृह हांकां नॉरिस हांणी फावंडेशनाचे माध्यमांतल्यान मजत केल्ली.
हालींच 19 मार्च 2026 ह्या दिसा पिरायेचे 86 वे वर्सा तांणी संवसाराचो निरोप घेतलो. सिल्वेस्टर स्टेलॉन, जॉन क्लूड व्हॅन डेम्म, डॉल्फ लुंडग्रेन, अरनॉल्ड शॉवरझेंनेगार, अक्षय कुमार
सारकिल्ले एक काळ अॅक्शन फिल्मां गाजयिल्ले व्हड सेलिब्रिटी सध्याक आपले सोशल मीडिया पोस्टा वरवी चक नॉरिस हांका आर्गां ओंपतना पळोवंक मेळटा. गुड बाय चक. थॅन्क यू फॉर एव्हरिथिंग.
सनतकुमार फडते
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
