भांगरभूंय | प्रतिनिधी
सतीश नायक संवसाराक अंतरलो. ताका जाल्लें दुयेंस फाटल्या पांच- स म्हयन्यांत बरें जावपाचें नांव घेनासलें. ते खातीर आयज ना फाल्यां वायट जातलें, हाचो अदमास आशिल्लोच. तरीय अशी वायट बातमी इतले बेगीन कानार पडटली अशें दिसूंक नाशिल्लें.
फाटलीं पांच दशकां परस चड काळ आमची इश्टागत आशिल्ली. हे खातीर सतिश आयज आमचे मदीं ना हाचें दुख्ख म्हाका जाताच. हालीं आमची भेट जाली ना. हॉस्पिटलांतय वचून ताचे भलायकेची वासपूस करप घडून आयलें ना. सतिश, सिनियर जर्नालिस्ट असोसिएशन ऑफ गोवाचो अध्यक्ष आशिल्लो. सात- आठ म्हयन्यां आदीं ताणें पर्वरे आपयिल्ले बसकेक आमी ज्येश्ठ पत्रकार हजर आशिल्ले. ती बसका घडये निमाणी आशिल्ली. त्या दिसा दनपारच्या जेवणा वेळार आमी खूब उलयले. पूण ते उपरांत ताका दुयेंस जालें आनी मेळप शक्य जालें ना.
असोसिएशनच्या वतीन आयोजीत जाल्ल्या फेडरेशनच्या राष्ट्रीय कांवसिल बसकेंतय तो वांटो घेवंक शकलो ना. ताची गैरहाजिरी आमकां सगळ्यांक जाणवली. पण ताचें हो संवसार सोडून वचप इतलें लागीं पाविल्लें हाची कोणाकूच कल्पना नाशिल्ली.
सतीश आनी हांव सादारण एकाच वेळार पत्रकारितेंत दाखल जाल्ले. सतीश नवप्रभेंत आनी हांव गोमंतकांत. म्हायती खात्यांतल्या असिस्टंट इन्फॉर्मेशन ऑफिसरच्या पदा खातीर आमी दोगांयनी बरोबरच मुलाखत दिल्ली. सादारण 1971- 72 ची गजाल आसतली. ताची निवड जाली तर हांव पत्रकारितेंतच रावलों. तो म्हायती खात्यांत काम करतानाय आमची इश्टागत कायम आशिल्ली. थंयच्यान आकाशवाणीच्या पणजी केंद्राचेर दाखल जालो. तेन्ना विधानसभा कामकाजाच्या खबरांक लागून आमकां दोगा-तिगा पत्रकारांक प्राधान्य मेळटालें. तेन्नाय सतिशाची भेट जाताली. इश्टागतीचें नातें कायम तिगून उरपाक सतीशाच्या कितल्याशाच गुणां मदलो एक गूण म्हणल्यार तो आपल्या इश्टांचे जल्मदीस केन्नाच विसरनाशिल्लो. जल्मदिसाक ताणें फोन करून शुभेच्छा दिल्यो ना अशें केन्नाच जालेंना. आतां म्हज्या फुडल्या जल्मदिसा ताचो फोन येवचो ना हें चिंतून काळीज भरून येता.
सतीशा वांगडा घालयल्ले खूब खीण आनी यादी आसात. मांडवी पूल कोसळिल्लो त्या दिसाची गजाल. हांव हाफ पँटींत पणजे आडकून उरिल्लो. तेन्ना सतीशान म्हाका आपली फुल पँट दिवन कामाक वचपाक दिलें. निवृत्ती उपरांतय आमचें इश्टागतीचें नातें कायम उरलें. सतीशान सेवानिवृत्ती उपरांत स्वताक घरांतच अडकोवन घेतला हें म्हाका खटकतालें. पूण ताचेर ताचींय खास मतां आशिल्लीं आनी ताचो आदर करपाकच जाय आशिल्लो.
गुरुधर्मापुरतोच तो अदीं मदीं मेळटालो. पूण जेन्ना जेन्ना मेळटालो तेन्ना तेन्ना ते खीण बरेच दीस यादींत उरताले आनी अजूनय आसात.
आयज सतीश परत न येवपाचे वाटेर पयस पयस गेला. ताच्यो कितल्योश्योच यादी आमच्या वांगडा आसतल्यो. सतीश गेल्ल्यान मोबायल फोना वयलो आनीक एक संपर्क कमी जाला. म्हजो इश्ट सतिशाक आर्गां.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
