भांगरभूंय | प्रतिनिधी
मडगांव : दक्षीण गोंय जिल्लोधिकारी कार्यालया वतीन इंधन विक्रीविशीं काडिल्ल्या ह्यान पयलींच्या आदेशांत मात्सो बदल करून सुधारीत आदेश जारी केलो. हातूंत नुस्तेंमारी वेवसाय आनी शिक्षणीक संस्थांक इंधन विक्रीच्या निर्बंधांतल्यान सवलत दिली.
जिल्लोधिकारी एग्ना क्लिटस हांणी २७ मार्चाक इंधन विक्री विशीं आदेश जारी केल्लो. ह्या आदेशांत आतां मात्सो बदल करून नवे सुदारीत नेम जाहीर केल्यात. ह्या नव्या नेमां प्रमाण, कांय विशिश्ट मळांक पेत्रोल आनी डिझलाच्या वापरांत निर्बंधांतल्यान सवलत दिल्या. जिल्लोधिकार्यांनी जारी केल्ल्या नव्या आदेशा प्रमाण,नुस्तेंमारी कडेन संबंदीत वेवसाय, नुस्तेंमारी बोटी आनी हेर उदकांतल्यान येरादारी करपी बोटीं सयत शिक्षणीक संस्थांतल्या ’डिझेल जनरेटर’ संचां खातीर इंधन उपलब्ध करून दितले.
तशेंच, हेर गरजेच्या सेवां खातीर सक्षम प्राधिकरणाच्या परवानगेन गरजेचें इंधन दितले. हे सवलतीचो लाव घेतना योग्य पडताळणी आनी सुरक्षा नेम पाळप सक्तीचें. हाचे भायर मूळ आदेशांतल्यो हेर सगल्यो अटी कायम उरतल्यो, अशेंय स्पश्ट केलें. हो सुदारीत आदेश रोखड्याच प्रभावाने लागू जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
