भारतान मॅच, रझान मनां जिखलीं

भांगरभूंय | प्रतिनिधी

भारतान झिम्बाब्वे आडची वन डे माळ 3-0 अशा फरकान जिखली आसली तरी कालची मॅच सिकंदर रझान गाजयली. ताणें अखेर मेरेन संघर्श करतना झिम्बाब्वेच्या जैता खातीर यत्न कायम दवरिल्ले. जैता खातीर 15 धांवड्यांची गरज आसतना शुभमन गिलान उत्कृश्ट कॅच धरून ताणें ताका तंबूंत धाडलो

ताचे बॅटिंगेन झिम्बाब्वेच्या क्रिकेट मोग्यांक खोशी केले. पांच विकेटी घेवपी ब्रॅंड इव्हान्सान आठवे विकेटी खातीर सिकंदराक साथ दितना शेंकड्याची भागिदारी केली.

ते आदीं टॉस जिखून भारतान पयलीं बॅटींग करपाचो निर्णय घेतलो. ताचो हो निर्णय कितलो योग्य आशिल्लो हें शुभमन गिलान दाखोवन दिलें. शिखर धवन आनी लोकेश राहुल हांणी डावाची सुरवात केली. राहुल हे मॅचींत व्हड खेळी करून फॉर्मांत येतलो अशें सगल्यांक दिशिल्लें. पूण, ताका व्हड खेळी करपाक जमली ना आनी ताका 30 धांवड्यांचेर समाधान मानचें पडलें. बाद जावचे पयलीं ताणें धवना वांगडा मेळून पयले विकेटी खातीर 63 धांवड्यांची भागिदारी केली.

राहुल बाद जाल्या उपरांत कांय वेळांत धवन लेगीत तंबूंत परतलो. ताणें 40 धांवड्यांचें योगदान दिलें. दोनूय ओपनर बाद जाल्या उपरांत गिलान मॅच गाजयली.

ताणें आक्रमक बॅटींग करतना वन डे क्रिकेटींतलो आपलो पयलो शेंकडो पुर्ण केलो. ताणें 97 बॉलांनी 15 चवके आनी एका सक्याचे मजतीन 130 धांवड्यांची खेळी केली. इशान किशनान ताका 50 धांवड्यांची खेळी करतना बरी साथ दिली. पूण, इशांता उपरांत गिलाक भारताच्या एकाय बॅट्समना कडल्यान बरी साथ मेळूंक ना. ताका लागून अखेरच्या ओव्हरींनी व्हड शॉर्ट खेळपाच्या यत्नांत गिल बाद जालो.

ताच्याय यत्नाक लागून भारताक निर्धारीत 50 ओव्हरींनी 8 विकेटी वगडावन 289 धांवड्यो करप शक्य जाल्यो. 290 धांवड्यांचो फाटलाव करपी झिम्बाब्वेची सुरवात बरी जाली ना. दीपक चाहरान ताका पयलो धपको दिलो. ते उपरांत सेन विलियम्स आनी टॉनी मोनयोंगा हांणी दुसरे विकेटी खातीर 75 धांवड्यांची भागिदारी केली.

मजगतीं, अक्षर पटेल आनी कुलदीप यादव हांणी झिम्बाब्वेची स्थिती 5 बाद 122 अशी केली. पूण, मदले फळयेंतल्या बॅट्समनांनी भारताच्या बॉलरांक घाम काडलो. अणभवी सिकंदर रझान शेंकड्याची खेळी केली. ताणें 87 बॉलांनी शेंकडो पुर्ण केलो.

रझा आनी इव्हान्स हांचे भागिदारी लागून झिम्बाब्वे जैताच्या लागसार पावलो. निमाण्या 18 बॉलांनी जैता खातीर 33 धांवड्यांची गरज आशिल्ली. आवेश खानान घाल्ले 48वे ओव्हरींत 16 धांवड्यो आयल्यो. अखेरेक आवेशान इव्हान्साक बाद करून भारताक थाकाय दिली. रझा आनी इव्हान्स हांणी आठवे विकेटी खातीर 75 बॉलांनी 103 धांवड्यांची भागिदारी केली.

निमाण्या 12 बॉलांनी 17 धांवड्यांची गरज आशिल्ली. शार्दुल ठाकुरान 49वे ओव्हरींत रझाक (115) बाद करून भारताक मॅचींत हाडलो. रझा बाद जाल्या उपरांत झिम्बाब्वेक 8 बॉलांनी 15 धांवड्यांची गरज आशिल्ली. शार्दुलान 49वे ओव्हरींत फक्त दोन धांवड्यो दिवन एक विकेट घेतली.

निमाणे ओव्हरींत झिम्बाब्वेक 15 धांवड्यांची गरज आशिल्ली. पूण, अखेरचे ओव्हरीच्या तिसऱ्या बॉलाचेर व्हिक्टर नायूचीक बोल्ड करून मॅच सोंपयली.