भांगरभूंय | प्रतिनिधी
पणजी: गोंयचो लघुपट ‘शिरीन’स इंटरमिशन’ हो दिग्दर्शक शर्वी धोंड हांच्या मार्गदर्शना खाला जाला. ह्या लघुपटाक मुंबयंत जाल्ल्या इंदुस ग्रँड इंटरनॅशनल अवॉर्ड्सांत मानसीक भलायकेचेर आधारिल्लो सर्वोत्तम लघुपट आनी सर्वोत्तम महिला केंद्रित चित्रपट पुरस्कार फावो जाले.
ह्या चित्रपटाचें दिग्दर्शन शर्वी धोंड हांणी केलां आनी तांणी लेखक आनी सह-छायाचित्रकार म्हणूनय काम केलां. चित्रपटाचें संपादन पूनम बिंद हांणी केलां आनी तांणीय सह-छायाचित्रकार म्हणून योगदान दिलां.
फलक फातिमा सिद्दीकी हांणी शिरीन आनी तिच्या गडद व्यक्तिमत्व अलिना ह्या दोट्टी भुमिकेन प्रभावी अभिनय सादर केलो. हातुंतल्यान चित्रपटाच्या मानसशास्त्रीय गाभ्याक बळ दिलें. शर्वी धोंड हांणी स्क्रिनाचेर मानसोपचारतज्ज्ञ डॉ. सुलिवन ही भुमिका साकार केली. कलाकारांमदीं शांभू धोंड हांचो चित्रपटांत दिग्दर्शकाच्या भुमिकेंत आसपाव आसा, तशेंच अभिनेत्री सोनिका लोटलीकार हांची एक विशेश भुमिका आसा. चित्रपटाचो व्हॉयजओव्हर देवोना गोम्स हांणी दिलो.
‘शिरीन’स इंटरमिशन’ हो शर्वी धोंड हांचो दिग्दर्शक म्हणून पयलो चित्रपट. ह्यान पयलीं तांणी द अवेकनिंग, स्मोक अँड मिरर्स, इमॅजिन इफ आय वॉज यू आनी इल्यूमिनेट ह्या लघुपटांत लेखक आनी प्रॉडक्शन सदस्य म्हणून काम केलें.
हो चित्रपट एक धाडसी आनी प्रभावी कथा सादर करता, जी शिरीन ह्या तरुण अभिनेत्रीभोवती फिरता. ही कथा वळख, आसक्ती आनी कलेच्या परिवर्तनशील शक्तीचें अत्यंत संवेदनशील आनी सखोल चित्रण करता.
शिरीन’स इंटरमिशनाचें हें येस गोंयचे चित्रपटसृश्टी खातीर एक म्हत्वाचो टप्पो आसा. हो चित्रपट उदयोन्मुख गोयच्या चित्रपट निर्मात्यांक वेगळ्या विशयांचेर आत्मविस्वासान काम करपाक प्रेरणा देता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
