भांगरभूंय | प्रतिनिधी
भारत एप्रिलांत रशिये कडल्यान ६ कोटी बॅरल कच्चें तेल विकत घेतलें
नवी दिल्ली: रशियेन १ एप्रील सावन पेत्रोल निर्यातीचेर बंदी घालपाचो निर्णय घेतला. ही बंदी ३१ जुलय मेरेन चलपाक शकता. रशियेचो उपप्रधानमंत्री अलेक्झांडर नोवाक हांणी उर्जा मंत्रालयाक पेत्रोल निर्यातीचेर बंदी घालपाचो प्रस्ताव तयार करपाक सांगलां.
देशांतली पुरवण तिगोवन दवरपा खातीर आनी दर वाडचे न्हय म्हूण हें पावलां, अशें रशियन सरकार सांगता.
मध्य उदेंतांत चालू आशिल्ल्या इझ्राएल-इराण झुजाक लागून संवसारीक तेल आनी पेत्रोलीयम उत्पादन बाजारांत अस्थिरताय वाडल्या अशें नोवाक हांणी सांगलें. हाका लागून दर चडपाक आनी देंवपाक लागलां. मात परदेशी बाजारांत रशियन उर्जा संसाधनांची मागणी कायम आसा.
ह्यान पयलीं पेट्रोल निर्यातीचेर बंदी घाल्ली
इंधनाचें दर नियंत्रीत करपा खातीर आनी देशांतली पुरवण स्थीर करपा खातीर रशियेन पेत्रोल आनी डिझेल निर्यात करपाचेर पयलींच बंदी घाल्या. फाटल्या वर्साय रशियेन कांय काळा खातीर पेत्रोल आनी डिझेल निर्यातीचेर बंदी घाल्ली. त्या वेळार युक्रेनांतल्या हल्ल्यांक लागून रिफायनरीजचें लुकसाण जाल्लें.
पूण रशियन उर्जा मंत्रालयाच्या म्हणण्या प्रमाण देशांत पेत्रोल आनी डिझेलाचो सांठो आसा. रिफायनरीज पुराय तांकीन काम करतात, जे देशाच्यो गरजो भागयतात.
उद्देगीक आंकडेवारी प्रमाण फाटल्या वर्सा रशियेन सुमार ५० लाख मेट्रीक टन पेत्रोलाची निर्यात केल्या, ती म्हणल्यार दिसाक सुमार १.१७ लाख बॅरल. पूण रशियेच्या ह्या निर्णयाचो भारताचेर व्हडलोसो परिणाम जावचो ना. भारत रशियेंतल्यान कच्चें तेल आयात करता आनी स्वताच शुध्दीकरण करता.
भारत एप्रिलांत रशिये कडल्यान ६ कोटी बॅरल कच्चें तेल विकत घेतलें
मजगतीं, इझ्राएल-इराण झुजाक लागून कच्च्या तेलाची पुरवण सांखळी खूब बादीत जाल्या. हाचेर मात करपाखातीर भारतीय रिफायनर्सनीं रशियेकडल्यान व्हड प्रमाणांत तेल घेवपाचें थारायलां. भारतान रशिये कडेन एप्रिल म्हयन्या खातीर सुमार ६ कोटी म्हळ्यार ६ कोटी बॅरल कच्च्या तेलाचो करार केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
