भांगरभूंय | प्रतिनिधी
कोरोनाचो फटको जसो हेर खेळां प्रकारांक बसलो तसोच तो आयपीएलाकूय बसलो. कोरोनाच्या सांवटातूय बीसीसीआयन आयपीएलाचें येसस्वी आयोजन केलें.
संवसारांतली सगल्यांत म्हारग आनी लोकप्रीय लीग म्हणून वळखुपी इंडियन प्रिमियर लीग म्हणल्यार आयपीएलाच्या एकोणिसाव्या हंगामाची सुरवात आयज सावन म्हणल्यार 28 मार्च सावन जातली. फुडले दोन म्हयने आयपीएलचो थरार चालू उरतलो. हे खातीर क्रिकेट मोग्यांक मनरिजवणेचें एक व्हड साधन मेळटलें. आयपीएलाची सुरवात 2008 वर्सा जाल्ली. म्हणल्यार आयज आयपीएलाक अठरा वर्सां पुराय जातात. ह्या अठरा वर्सांत क्रिकेटीच्या मैदानार आनी मैदानाचे भायर खूबश्यो घडामोडी घडल्यो. पूण आयपीएलाची लोकप्रियता मात लेगीत उणी जाली ना. आयपीएलाकूय मॅच फिक्सींग सारकी कीड लागिल्ली. मॅच फिक्सींगचे आरोप जाल्ल्यान कांय खेळगड्यांक कायमचे घरा बसयले. जाल्यार चेन्नय आनी राजस्थान ह्या लोकप्रीय पंगडाचेर दोन वर्सांची बंदी घाल्ली. मॅच फिक्सिंगेक लागून आयपीएलाक देंवती कळा लागतली असो अदमास आशिल्लो. पूण तो फेल थारलो. उरफाटें आयपीएल आनीक लोकप्रीय थारली.
कोरोनाचो फटको जसो हेर खेळां प्रकारांक बसलो तसोच तो आयपीएलाकूय बसलो. कोरोनाच्या सांवटातूय बीसीसीआयन आयपीएलाचें येसस्वी आयोजन केलें. केन्ना देशांत जाल्यार केन्ना विदेशांत, जाल्यार केन्ना प्रेक्षकां बगर जाल्यार प्रेक्षकां सयत आयपीएलाचें आयोजन करू बीसीसीआयन क्रिकेट मोगींक आयपीएलाचो थरार अणभवपाची संद मेळोवन दिली. संवसारभरांतल्यो हेर लीग कोरोनाक लागून ठप्प जाल्ल्यो आसतना बीसीसीआयन आयपीएलाचें येसस्वी आयोजन करून संवसारा मुखार वेवस्थापनाचो आदर्श घालून दिलो. सुरवातेक आठ पंगडा मदीं खेळपी ही सर्त आतां दोन वर्सां सावन धा पंगडां मदीं खेळटात. गुजरात टायटन आनी लखनौ सुपर जायंटस ह्या दोन नव्या पंगडाची आयपीएलांत एंट्री जाल्ल्यान आयपीएलाचो थरार आनीक वाडला. विशेश म्हणल्यार गुजरात टायटन ह्या पंगडान पदार्पणातूच जैत जोडलें आनी सगल्यांक अजापीत केलें. इतलेंच न्हय जाल्यार दोन वर्सां हो पंगड फायनलींत पावलो. म्हणल्यार पदार्पणाच्या पयल्या दोन वर्सांतूच जैतिवंतपद आनी उपजैतिवंतपद हातासून ह्या पंगडान आपलें कर्तुत्व दाखोवन दिलें. आयपीएलांत धा पंगड आसले तरी आयपीएलाचेर चेन्नय आनी मुंबय ह्या दोन पंगडाचेंच वर्चस्व उरलां. दोनूय पंगडांनी दरेकी पांच फावटी जैतिवंत जावन आयपीएलचेर आपलें एकाहाती वर्चस्व सिद्ध केलां. ह्या दोगां बगर कोलकाता आनी हैद्राबाद ह्या पंगडांनी लेगीत दोन फावटी जैत जोडलां जाल्यार राजस्थान आनी गुजरात ह्या पंगडांनी एकदां जैत जोडलां.
पोरूं वर्सां म्हणल्यार 2025 वर्सा रॉयल चॅलेंसर्ज बंगळुरू ह्या पंगडान जैत मेळोवन आपल्या जैतिवंतपदाचो दुकळ सोंपयलो. पंजाब, दिल्ली, लखनौ ह्या पंगडांक मात अजून एकठांय आयपीएलाचो करंड फावो जालो ना. ह्या वर्सा आयपीएलाक नवो जैतिवंत पंगड मेळटलो? हाची उत्सुकताय क्रिकेट मोगींक लागून आसा. म्हळ्यार ह्या वर्साय चेन्नय आनी मुंबय हेच दोन पंगड जैतिवंतपदा खातीर प्रबळ दावेदार आसात. तशेंच कोलकाता, बंगळुरू आनी गुजरात हे लेगीत जैताचे सर्तींत आसात. घडये ह्या वेळार एखादो नवोच पंगड जैतिवंत जावन सगल्यांक अजापाचो धपको दीत जाल्यार अजाप जावपा सारके नाका. हे फावटीची सर्त एका नव्या कारणाक लागून लेगीत चर्चेत आसा. ती म्हणल्यार ह्या वेळार खूबशा पंगडांनी आपले मुखेली बदल्ले. ज्या धोनी आनी रोहीत शर्मान आपल्या पंगडाक पांच फावटी जैतिवंतपद मेळोवन दिलें तांकां हे फावटी फक्त खेळगडे म्हूण मैदानार देंवचें पडटलें. कारण मुंबयच्या पंगड वेवस्थापनान रोहीत शर्माचे सुवातेर हार्दीक पांड्याक मुखेली म्हूण वेंचून काडला. जाल्यार धोनीन स्वता मुखेलीपदाचो त्याग केल्ल्यान तरणाटो खेळगडो ऋतुराज गायकवाडाच्या गळ्यांत चेन्नयच्या मुखेलीपदाची माळ पडल्या. गुजरात पंगडाचे मुखेलीपद शुभमन गील हाच्या खांद्यार आसा. कोलकाताचो मुखेली अणभवी अजिंक्य रहाणे आसा जाल्यार फाटल्या वर्सा कोलकाताचो मुखेली आशिल्लो श्रेयस अय्यर ह्या वेळार पंजाब सुपर किंग्साचो मुखेली आसा.
जाल्यार जिवघेण्या अपघातांतल्यान वाटाविल्लो ऋषभ पंत लखनौचो मुखेली आसून दिल्लीचो मुखेली अक्षर पटेल आसा. तरणाटो खेळगडो रजत पाटीदारा कडेन बंगळुरूचें मुखेलीपद आसतलें. जाल्यार ईशान किशना कडेन हैदराबदाचें आनी रियन परागा कडेन राजस्थानाचें मुखेलीपद सोंपोवन संघ धनयांनी तांच्यातल्या नेतृत्व गुणाक चालना दिल्या. ह्याच तरणाट्यां खेळगड्यां पैकीं एखादो खेळगडो फुडारांत भारतीय पंगडाचो मुखेली जावंक शकता. म्हणल्यार फुडारांतल्या भारतीय पंगडाच्या मुखेल्याची बुन्याद ह्याच आयपीएलांतल्यान जातली. फक्त मुखेलीच न्हय जाल्यार फुडारांतलो पुराय भारतीय पंगडच आयपीएलांतल्यान वेंचून काडुये. आयज जे खेळगडे भारतीय पंगडांत दिसतात ते सगले खेळगडे आयपीएलांतल्यान मुखार आयल्यात.
भारतीय पंगडातलो सूर्यकुमार यादव, जडेजा, शुभमन गील, यशस्वी जयस्वाल, श्रेयस अय्यर, जसप्रीत बुमाराह, कुलदीप यादव, यजुवेंद्र चहल, वॉशिंगटन सुंदर, मोहंमद सिराज, संजू सॅमसन, ईशान किशन, वरुण चक्रवर्ती, अभिषेक शर्मा, ऋषभ पंत अशे सगलेच खेळगडे आयपीएलाची देणगी आसा. आयपीएलांत बरी कामगिरी केल्ल्यान ह्या खेळगड्यांक भारतीय पंगडांत प्रवेश मेळ्ळो. आयपीएल म्हणल्यार भारतीय पंगडांत प्रवेश करपाचें प्रवेश दार आसा. ताकाच लागून आयपीएलांत बरी कामगिरी करपा खातीर खेळगडे मैदानार घाम गळयतात. आयपीएलांत बरी कामगिरी करून भारतीय पंगडांत प्रवेश मेळोवपाचें सपन सगले खेळगडे पळयतात. तें सपन यशस्वी करपा खातीर ते खर कश्ट घेतात. ताकाच लागून आयपीएलांतल्यो सगल्योच मॅची बऱ्यो जातात आनी प्रेक्षकांक खेळाचो आनंद घेवंक मेळटा. ह्या वर्साय आयपीएलाच्यो सगल्यो मॅची बऱ्यो जातल्यो आनी प्रेक्षकांक खेळाचो आनंद घेवंक मेळटलो हातूंत मात लेगीत दुबाव ना.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
