पोटवेंचणूक ः पत रितेशाच्या बाबाची

भांगरभूंय | प्रतिनिधी

फोंडें पोटवेंचणूक प्रतिश्ठा एका बाबाची, बाबाचे प्रतिमेची. भिरांकूळ परिस्थितींत, झुजाच्या वगतार दुसऱ्यांक हांसोवपी रवीबाब रितेशाच्या रुपांत फोंडेंच्या मतदारांक दिसतात व्हय?

गोंयचे आदले मुख्यमंत्री रवी नायक हे काळजाच्या आताकान अचकीत साडेपांच म्हयन्यां आदीं संवसाराक अंतरले. फोंडें मतदारसंघांतूच न्हय जाल्यार गोंयचे उदरगतींत रवीबाबाचो वांटो. येस अपेसांतल्यान फुडें वतना रितेश, राॅयाक राजकारणाची वाट दाखोवन ते गेले. फोंडें विधानसभा पोटवेंचणूक म्हणल्यार त्या अर्थान रितेशाच्या बाबाची पत.
फोंडे पोटवेंचणुकेंत रितेशाच्या बाबाची व्हडविकाय सगलेच उमेदवार सांगतात. ते व्हडविकाये परस रितेशा कडेन आनिकूय कितें तरी आसा. नगरसेवक म्हूण रितेशान केल्लो वावर तितलोच म्हत्वाचो. रवीबाबांक आर्गां ओंपपी पणजे सरकारी बसका जाल्ली. तेन्ना मुख्यमंत्री डाॅ. प्रमोद सावंत हांच्या म्हऱ्यांत रितेश बशिल्लो. तेन्नाच ताका उमेदवारी मेळटली हें कळटालें, भांगरभूंय दिसाळ्यांत तेविशीं बरयिल्लें.
इंग्लेज कितें तापयतात? राज्याचे राजभाशेंतल्यान उलयात अशें राष्ट्रीय दिसाळ्याच्या पत्रकाराक सांगपी रवीबाब गणेशभक्त. जंय वता थंय सावन सोबीत गणेशमुर्ती दिसल्यार ती हांव विकती घेतां अशें रवीबाबान एकदां पत्रकारांक सांगिल्लें. ज्या समाजांत जल्मले त्या समाजाक भोवमानाचो मार्ग दाखोवपांत तांचो व्हड वांटो आसा. रवीबाबान जिखून आयले उपरांत केल्लीं पक्षांतरां कायद्याच्या पुस्तकांतल्यो देखी जाल्यांत. एकूय वेंचणूक जिखचे आदीं केल्ल्या पक्षांतरांक कितें म्हणप? कसली गिरेस्तकाय ती? ते गिरेस्तकाये परस थिराय म्हत्वाची. कोणे ती दिल्या ताची जाणविकाय फोंडेंच्या मतदारांक आसा.
मडकय, फोंडें मतदारसंघांतल्यान विधानसभा वेंचणूकच न्हय लोकसभा वेंचणूक जिखपी रवीबाब एक उद्देजक. ते पाॅपुलर जातना तांचेर आरोप जाले, तांच्याय वांट्याक अपेसय आयलें. अपेसा कडेन झुजत रवीबाब फुडे गेले, वेंचणुके दिसा चलत, भोंवत कार्यकर्त्यांच्या न्हय पत्रकारांच्या खांदार हात घालत.
शिक्षण, बायलां आनी भुरगीं, शेतकामत, हाॅटेल उद्देगाच्या मळार रवीबाबांचो वावर यादींतलो. फोंडें वेंचणुकेंत देंविल्ले सगलेच राजकी पक्ष, उमेदवार तांच्यो यादी सांगतात. रवीबाबांच्या पुताक रितेशाक त्यो यादीच आधार.
फोंडें पोटवेंचणूक प्रतिश्ठा एका बाबाची, बाबाचे प्रतिमेची. भिरांकूळ परिस्थितींत, झुजाच्या वगतार दुसऱ्यांक हांसोवपी रवीबाब रितेशाच्या रुपांत फोंडेंच्या मतदारांक दिसतात व्हय? रितेशाची पयली विधानसभा वेंचणूक फोंडें मतदारसंघांतली. ते वेंचणुकेंत ताच्या आदाराक नासतले. आयज बाबा नासलो तरी बाबाची पत आसा. वीज मंत्री रामकृष्ण (सुदिन) ढवळीकार, आमदार गोविंद गावडे, उदका सांबाळ मंत्री सुभाष शिरोडकार रितेशाच्या फाटल्यान आसात. सगल्यांत व्हडल्या, केंद्रांत सत्तेर आशिल्ल्या राजकी पक्षाचे रितेश उमेदवार. पोटवेंचणुकेंत सर्त आसा, भिरांत ना. ही वेंचणूक रितेशाक बरें, वायट शिकयतली, 2027 चे विधानसभा वेंचणुकेचो मार्ग दाखयतली.
कित्याक याद जाली विरोधी पक्ष मुखेली युरी आलेमावांक रवीबाबांची? 14 दिसांचे आदले मुख्यमंत्री युरीबाबांचे बापुलये चर्चीलबाब आलेमांव हांच्यो यादी सांगल्यार फुडार दिसतलो फोंडें पोटवेंचणुकेंतल्यान? पणजी म्हापालिका वेंचणुकेंत जें जालें तेंच फोंडें वेंचणुकेंत जातलें हें तांकां कळ्ळां.
रवीबाबांच्यो यादी जागोवन ते बळगें दितात रितेशाक, भिवपाची गरज ना हो मंत्र तसो तांच्याय वळखीचो. तोच मंत्र तांकां रितेशाचे वाटेन व्हरता अशें राजकारण सांगता. याद जाता व्हय युरीक ह्या खिणाक भाजपाक तेंको दिवपी बापाेलयाची? सांगें मतदारसंघांतले विधानसभा वेंचणुकेची? गोंय वाटावपाक वीख खावपाक युरीबाब तयार जाल्यात. कोणे बुद्ध दिली तांकां वीख खावपाची? विखाची भास नाका, मतदारांक जाय शांतिकाय.
शांतिकायेचे भाशेची तांक गिमाळ्या दिसांनी दिवपी, शिक्षणीक मळार वावुरपी रवीबाब युरीबाबांचे आदर्श कित्याक जाल्यात? फोंडें पोटवेंचणूक तंट्या विरयत जावची हेखातीर युरीबाबान वावुरचें. काँग्रेस पक्षाचे उमेदवार केतन भाटीकार रवीबाबा आड म. गो. पक्षाचे उमेदवार आशिल्ले ही म्हायती युरीबाब दीत व्हय? काल मेरेन म. गो. पक्षांत आशिल्ल्या भाटीकार हांकां काँग्रेसीन उमेदवारी कित्याक दिली ? काँग्रेसी कडेन रितेशा आड झुजपी आनीक उमेदवार नासले?
विखुरिल्ली काँग्रेस, म. गो. च्या खांद्या वयल्यान भाजपा व्हड जालो. पोटवेंचणूक म. गो.चीय पत, त्याच पक्षान रवीबाबांच्या राजकारणाची बुन्याद घाल्ली. फोंडें वेंचणूक म. गो.चो फुडार थारावपी, तीच तर पात्रांवाच्या इश्टाची, म.गो. भाजपा युतीची परिक्षा. सेमीफायनल 2027 चे विधानसभा वेंचणुकेची. पणजे म्हापालिका वेंचणुकेवरी. आम आदमी पार्टीच्या गीतेश नायकाचें मूळ खंय?
रवीबाबांच्या वेंचणुकेच्या रिजल्टाचेर एक नदर मारल्यार तांकां सदांच झुजचें पडलां हें कळटा. खर सर्त, झुजा वेळारय ते मदींच मतां मेजप सभाघर सोडून वचपी न्हय. रवीबाबांचो राजकी उत्तराधिकारी भाजपांतल्यान घडटा तेन्ना भाजपाचे केंद्रीय मंत्री, मंत्र्यांचे पूत रितेशा वांगडा भोंवतले. आपली पत राखपाक.
गॅसाक रांगो, पेत्रोल, डिझलाक रांगो. पोटवेंचणुकेक रितेश उमेदवारीचो अर्ज दितना मुख्यमंत्री हाजीर
आशिल्ले. तांकांय त्यो दिसल्यो, उपाय ताकतिकेन घेतल्यात. चार वर्सांत फोंडें कितलें बदल्लां तें तांकां खबर आसा. आतां प्रदेश भाजपाच्या हेर आमदारांकय कळटलें फोंडें कितें तें. हेर राजकी पक्ष आपल्या कार्यकर्त्यांचे, मतदारशक्तीचो अदमास बांदतात. नगरसेवक, नगराध्यक्ष म्हणून रितेशान हालीं मेरेन केल्ल्या वावराचो ताका लाव जातलो. हेर उमेदवार समाजीक कार्यांत आसूनय तांकां रितेशाच्या बाबाच्या नांवाचो आलाशिरो कित्याक घेवचो पडटा?
समोसा खाओ, च्याय पिओ हीं रितेशाच्या बाबाचीं उतरां. फाटले विधानसभा वेंचणुकेंतच न्हय मंत्रीपद मेळ्ळे उपरांत रवीबाब तीच उतरां आयकयताले. आयज त्याच उतरांचो उपेग सगले उमेदवार करतात व्हय? आमी सगले एक अशें सांगूनय आम आदमी पार्टेचो उमेदवार वेंचणुकेंत कित्याक? तशें पळेल्यार गोवा फाॅरवर्डाचे पदाधिकारी दुर्गादास कामत रवीबाबाकच न्हय भाजपाकय लागींचे. दुर्गादास फोंडे नगरपालिका वेंचणुकेंत फुडारांत देंवल्यार तांकां नगरसेवक जावपाची संद आसा. आपल्या प्रभागांत चडांत चड मतां काँग्रेसीच्या उमेदवाराक ते दीत व्हय? रवीबाबाच्यो यादी सांगत.
पणजेची येरादारी कोंयडी फोडपाची वाट सरकाराक फोंडें पोटवेंचणूक दाखयतली. पोटवेंचणुकेच्या प्रचाराचो बोवाळ निमाणें चार दिसांनी चड जातलो. जिल्हो पंचायत, पणजी म्हापालिका वेंचणुकेंत सर्त आशिल्ली, भाजपान ती जिखली कार्यकर्त्यांच्या बळग्यार. पोटवेंचणुकेंतय सर्त आसा, कार्यकर्ते रितेशाचे, रवीबाबांचे आनी प्रदेश भाजपाचे एकेवटेन. दुसरेवटेन काँग्रेस, गोवा फाॅरवर्डाचे आसतले. आम आदमी पार्टीच्या कार्यकर्त्यांची नवी बांदावळ जाता. प्रचाराक नेट येता तशें दालें कोणाचें जड तें कळटलें आनी पतय रितेशाच्या बाबाची.

सुहासिनी प्रभुगांवकार
9881099260