गोंयची बेरोजगारी दर देशांत सगल्यांत चड: केंद्रीय अहवाल

भांगरभूंय | प्रतिनिधी

पणजी: केंद्रीय सांख्यिकी आनी प्रकल्प अंमबलजावणी खात्यान जारी केल्ल्या नियतकालीन श्रमबळ सर्वेक्षण (पीएलएफएस) अहवाला प्रमाण बेरोजगारी दरांत गोंय देशांत पयल्या स्थानार आसा. जानेवारी ते डिसेंबर 2025 मजगतीं गोंयची बेरोजगारी दर 8.3 टक्के आशिल्ली. हे वळेरेंत नागालॅण्ड दुसऱ्या स्थानार आसून थंयची बेरोजगारी दर 6.7 टक्के आशिल्ली. ह्या काळांत बेरोजगारी दराची राष्ट्रीय सरासरी 3.1 टक्के आशिल्ली. हातूंत मुळावें शिक्षण पुराय करीत सावन ते पदव्युतर शिक्षण पुराय केल्ल्यांचो आस्पाव आसा. हे खातीर खात्यान देशभरांतल्या 1.48 लाख कुटुंबांतले 6.56 लाख मनशांचें सर्वेक्षण केल्लें.

अहवाला प्रमाण बेरोजगारी दर चड आसपाचे वळेरेंत नागालॅण्डा उपरांत अरुणाचल प्रदेशाचो क्रमांक लागता. थंय बेरोजगारीची दर 6.6 टक्के आशिल्ली उपरांत मणिपूर (5.9 टक्के), पंजाब (5.3 टक्के), उत्तराखंड (5.1 टक्के), तेलंगणा (5 टक्के), मेघालय (4.8 टक्के), हरियाणा (4.5 टक्के), हिमाचल प्रदेश (4.5 टक्के), राजस्थान (4.3 टक्के) ह्या राज्यांचो क्रमांत लागता.

देशांत सगल्यांत उणी म्हणल्यार 0.9 टक्के बेरोजगारी दर गुजरातांत आसा. तशेंच मध्य प्रदेश (1.5 टक्के), कर्नाटक (2.3 टक्के), छत्तीसगड (2.3 टक्के), महाराष्ट्र (2.4 टक्के) हांगा बेरोजगारी दर तुळेन उणी उरल्या.

अहवाला प्रमाण गोंयांत गांवगिऱ्या वाठारांत बेरोजगारी दर 11.9 टक्के जाल्यार शारी वाठारांत 6.1 टक्के इतली आशिल्ली. गांवगिऱ्या वाठारांत दादल्यां मदीं बेरोजगारी दर 12.1 टक्के जाल्यार बायलां मदीं 11.4 टक्के आशिल्ली. शारी वाठारांत दादल्यां मदीं बेरोजगारी दर 6.6 टक्के जाल्यार बायलां मदीं 4.8 टक्के उरली.

बेरोजगिरी विशीं गोंय सरकारान हाचे आदींय स्पश्टीकरण दिल्लें. सरकारी नोकरी मेळत हे आशेन खाजगी नोकरेंत आसपी खूबशे जाण रोजगार विनियम नोंदणी वळेरेंतल्यान आपलें नांव काडिनात. हाका लागून बेरोजगारांची संख्या चड दिसत आशिल्ल्याचें स्पश्टीकरण दिल्लें.

अहवाला प्रमाण, केंद्र शासीत प्रदेशांत अंदमान आनी निकोबारांत सगल्यांत चड 10 टक्के बेरोजगारी दराची नोंद जाली. लक्ष्वद्वीपांत 6.9 टक्के, चंदिगढांत 5.7 टक्के, जम्मू आनी काश्मीरांत 4.9 टक्के जाल्यार दादरा नगर हवेलींत 1.6 टक्के इतली बेरोजगारी दर उरली.