भांगरभूंय | प्रतिनिधी
पणजी : भाजप सरकार सुरवातेक सावनूच कुडचडेंचें लैंगीक अत्याचार प्रकरण दामून दवरपाचो यत्न करता. ह्या प्रकरणांतल्या आरोपीक संरक्षण दिवपाचो यत्नूय जाता. मात आमी अशें जावपाक दिवचे ना. ह्यान पयलीं आमी हें प्रकरण राष्ट्रीय पांवड्यार हाडलां. फाल्यां आमी राज्यपालांक मेळटले. तशेंच हें प्रकरण संसदेंतूय हाजीर करतले अशें आप प्रदेशाध्यक्ष वाल्मिकी नायक हांणी सांगलें. शक्रारा पक्षाचें शिश्टमंडळ पुलीस पुलीस मुख्यालया सामकार माध्यमां कडेन उलयलें.
ह्या प्रकरणांतलो आरोपी भाजप नगरसेवकाचो पूत. हाका लागून प्रकरण जेन्ना मुखार आयलें तेन्नाच्यानूच तें दामून दवरपाचो यत्न करपाक सुरवात जाली. हातूंत गोंय पुलिसांचोय आसपाव आसा. हें प्रकरण गंभीर आशिल्ल्यान आमी आयज पुलीस महासंचालकांक निवेदन दिवपाक आयिल्ले. मात तांणी फकत दोन मनशांक मेळपाची परवानगी आशिल्ल्याचें सांगलें. खांपे गुन्यांवकार आशिल्ले वरीं आमकां मुख्यालयाच्या दाराचेरूच आडायले. गोंय पुलिसांनी आपूण कोणाक भियेतात हें सांगप गरजेचें, अशें वाल्मिकी नायक हांणी म्हणलें.
ह्यान पयलीं २५ वर्सां आदीं मिरामार अशेंच सॅक्स स्कँडल जाल्लें. तेन्नाय आरोपीक वाटयल्लो. कुडचडें प्रकरणांत हांगच्या नागरिकांचें चेंपण वाडले उपरांत पुलिसांनी कागाळ नोंद केली. भाजपा कडेन संबंदीत आशिल्ल्यान पुलिसांनी आरोपी आनी ताच्या बापायची वळख लिपोवपाचो यत्न केलो. हेर नगरसेवकांक पुलीस स्टेशनांत व्हरून चेंपण हाडचें पडिल्लें. एनजीओनी चेंपण हाडले उपरांतूच आरोपीचेर पॉक्सो गुन्यांवाची कलमां दाखल केलीं. भाजप प्रदेशाध्यक्षांनी ह्या प्रकरणांत खर भुमिका घेवप गरजेचें आशिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
