भांगरभूंय | प्रतिनिधी
कलम ३९ ए आडची मोहीम आनीक खर जावपाची गरज
पणजी : आपल्या मतदारसंघाकडेन संबंदीत आशिल्ले ८०९२६ चौकण मीटर जमनीच्या रूपांतरणाचो प्रस्ताव मुख्यमंत्र्यांनी बेगोबेग रद्द केल्यान आतां हेर आमदारांनी लेगीत आपल्या मतदारसंघातली जमीन रूपांतरणां रद्द करून घेवचीं. मुख्यमंत्री डॉ. प्रमोद सावंत तशेंच नगरनियोजन मंत्री विश्वजीत राणे हांचेर आमदारांनी चेपण हाडचें, अशी मागणी एड. क्लीओफात कुटिन्हो हांणी केल्या.
एक, एक प्रस्ताव रद्द करपा परस नगरनियोजन कायद्याचे कलम ३९ ए रद्द कित्याक करचे न्हंय? असो प्रस्न ऍड. क्लीओफात कुटिन्हो हांणी केला. सांखळे जमीन रूपांतरणाचो प्रस्ताव रद्द जाले उपरांत समाज माध्यमाचेर लेगीत कलम ३९ ए रद्द करपाची मागणी करपी पोस्टांचो खच पडला.
कलम ३९ ए आड सर्वोच्च न्यायालयात याचिका आसा. तशेंच इनफ इज इनफ बॅनराखाला लोकचळवळ सुरू आसा. मुख्यमंत्री डॉ. सावंत हांणी एके आदेशावरवी साखळेतले जमीन रूपांतरण रद्द केले. हे फांटभुयेर ते कलम ३९ ए रद्द कित्याक करू शका ना? अशी मतां उक्तायली वता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
