भांगरभूंय | प्रतिनिधी
पणजी : उत्तर गोंयांत सरकारी इमारती तशेंच भौशीक सुवातांचेर लायिल्ले बेकायदेशीर बॅनर्स, पोस्टर्स तशेंच होर्डिंगां काडून इमारती तशेंच भौशीक सुवातो नितळ करच्यो, असो आदेश उत्तर गोंय जिल्लोधिकार्यांनी जारी केला. तिसवाडी, बार्देस, पेडणें, दिवचल आनी सत्तरीच्या उपजिल्लोधिकार्यांनी कार्यवाही करून ७ दिसांत अहवाल सादर करचो, अशेंय तातूंत म्हणलां.
नगरपालिका प्रशासन संचालक आनी पंचायत संचालकांक लेगीत भौशीक सुवातां बाबत करपी पोस्टर, बॅनर काडून सात दिसांत कार्यवाही अहवाल सादर करपाक सांगलां.
राजकी पक्ष तशेंच फुडार्यां कडल्यान बरेच खेपे इमारती तशेंच भौशीक सुवातांचेर बॅनर लायतात. जल्मदिसा निमतान होर्डिंग उबारतात. हाका लागून भौशीक सुवातो तशेंच मालमत्तेचें विद्रूपीकरण जाता. कांय वेळार तरेकवार आस्थापनां तशेंच कंपनीं कडल्यान जायरात करपाक बॅनर्स वा पोस्टर्स लायतात. लायटीचे खांबे, सरकारी इमारती तशेंच रस्त्या कुशीच्या सुचोवणी तकट्यांचेर बॅनर लायिल्ले दिसतात.
गोंय मालमत्ता विद्रूपीकरण कायदो १९८८, नगरपालिका कायदो १९६८ आनी पंचायत राज कायदो १९८४ वरवी हाचेर कारवाय करपाचे अधिकार आसा. ह्या कायद्या प्रमाण सरकारी इमारती वा भौशीक सुवातांवेले बेकायदो पोस्टर्स, बॅनर्स, होर्डिंग्स काडचीं आनी विद्रुपीकरणा आड कारवाय करची, असो आदेश काडला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
