भांगरभूंय | प्रतिनिधी
वाळपय: सत्तरींतल्या कांय वाठारांनी चक्रीवादळाचो बरोच फटको बसलो. चक्रीवादळाक लागून घरांचें बरेंच लुकसाण जालें आनी झाडां पडलीं. सुरंगुली, धारगे, खोतोडा, मलपण चक्रीवादळ लागलें. हांगच्या घरांचें पांखें, पत्रे उडून गेल्ल्यान आनी झाडां घरांचेर पडिल्ल्यान बरेंच लुकसाण जालें.
अचकीत आयिल्ल्या चक्रीवादळान थळाव्यां मदीं भंयाचें वातावरण निर्माण जालें. हे विशीं उजो पालोवपी दळाक म्हायती दिली. तांणी चक्री वादळाक लागून आयिल्ली आडखळ आनी पडिल्लीं झाडां कुशीक काडपाक सुरवात केली.
उजो पालोवपी दळा कडल्यान मेळिल्ले म्हायती प्रमाण, सुरंगुली हांग लक्ष्मी गांवकार हांच्या घराचेर आंब्याचें झाड पडिल्ल्यान ३० हजार रुपयांचें लुुकसाण जालें, जाल्यार ३५ हजारांची मालमत्ता वाटयली.
सुरंगुली हांगा निळकंठ गावकार हांच्या घराचेर आंब्याचे झाड पडून ३० हजारांचें लुकसान जालें, जाल्यार ४० हजारांची मालमत्ता वाटयली.
धार्गे, साकोड्ड्यां आंब्याचें झाड एकनाथ गांवकार हांच्या घरार पडून सुमार ५० हजार रुपयांचें लुकसाण जालें. जाल्यार १ लाखांची मालमत्ता उजो पालोवपी दळान वाटयली.
सुरंगुली हांगा लायटीच्या खांब्यार पडिल्लें पणसाचें झाड उजो पालोवपी दळान कुशीक काडलें. मात हातूंक कांयच लुकसाण जावंक ना. सुरंगुली हांगा रस्त्यार पडिल्लें पणसाचें झाड काडून रस्तो मेकळो केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
