भांगरभूंय | प्रतिनिधी
पैंगीण: किनारी नियमन विभागा वतीन जिल्लोधिकार्यांक आदेशा प्रमाण आयज बुधवारा, दक्षीण गोंय बांदकाम हटाव पंगडान आगोंद पंचायत वाठारांतल्या वाल हांगचीं बेकायदेशीर बांधकामां काडपाक सुरवात केली. वट्ट ६८ बेकायदेशीर बांधकामां मदलीं ३३ बांधकामां उणीं जातलीं.
बांधकामां काडपाच्या वेळार गोंय दर्यादेग विभागी वेवस्थापन प्राधिकरण क्षेत्रीय अधिकारी रौनत देसाय, पंचायत संचालनालयाचे अमोल नायक गांवकार, राजेश टी. गांवकार, मामलेदार गजेश शिरोडकार, संयुक्त मामलेदार गायत्री देसाय, पोलीस निरीक्षक प्रवीण गांवस, मडगांव, काणकोण पुलीस फौज फांटो आनी हेर ह्या वेळार हाजीर आशिल्ले.
आल्कामिस्ट हे कंपनीन दर्यादेग नियमन विभागाक वाल हांगचे दर्यादेगेवेल्या जमनीवेल्या बेकायदेशीर बांधकामांचेर कारवाय करपाची कागाळ दिल्ली.
६८ बांधकामां मदलीं कांय जाणांनी आपापलीं आस्थापनां स्वता काडलीं, जाल्यार कांय जाणांनी स्टे हाडून बांदकामांचें रक्षण केलें.
आयज सी.एन. कॉटेज, लाईव्ह लायन हॉलिडे हाऊस, रामसान्ग रिसोर्ट, रैमी फेर्नांडीस, रामलिंग लक्जरियस रिसोर्ट, मानदला कॅफे आनी हेर बेकायदेशीर बांधकामां मेळून बांदकाम हटाव पंगडाक वट्ट ११ बांदकामां काडपाचो आदेश मेळ्ळो, अशी म्हायती वरीश्ठ अधिकार्यांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
