भांगरभूंय | प्रतिनिधी
पणजी: हिंदु जनजागृती समिती प्रणीत ‘रणरागिणी’ शाखेन कुडचडें-काकोड्यां नेण्ट्या चलयांचेर अत्याचार आनी ब्लॅकमेलिंग प्रकरणाचो जाहीर निशेध आनी दुबाविताचेर खर कारवाय करपाची मागणी केल्या.
थळाव्या लोकप्रतिनिधीच्या पुताचो ह्या गंभीर गुन्यांवांत आसपाव आशिल्ल्याचें पुलीस चवकशेंत मुखार आयलां. हे घडणुकेन पुराय गोंयच्यो बायलो आनी भुरग्यांचे सुरक्षिततायेचो प्रस्न मुखार आयला.
नेण्ट्या चलयांचें लैंगीण शोशण करून तांचे अश्लील व्हिडिओ तयार करप आनी ताचे वरवीं तांकां ब्लॅकमेल करप हें मनिसपणाक दाग लावपी प्रकार. ह्या प्रकरणांत खंयच्याच चेंपणा बगर तपासणी जावप गरजेचें. ह्या प्रकरणांतले खटले न्यायालयांत वेगान चलोवन पिडेस्तांक रोखडोच न्याय दिवचो आनी दोशींक कायद्यांतल्या तरतुदीं प्रमाण खर ख्यास्त दिवची. गरज पडल्यार पिडेस्तांक संरक्षण दिवचें. पिडेस्त चलयेचो फुडार सुरक्षीत दवरपाक गरजेचीं पावलां उबारचीं.
गोंयांत अशे तरेचे विकृतीक थारो दिनासतना स्त्री शक्तीचो सन्मान करचो. ह्या प्रकरणांत दुबाविताक कोणेंय फाटबळ दिवपाचो यत्न केल्यार ‘रणरागिणी’ हो प्रकार खपोवन घेवची ना, अशी शिटकावणी रणरागिणी वतीन दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
