भांगरभूंय | प्रतिनिधी
पणजीः नुस्तेमारी खात्यांतल्या दोन कर्मचार्यांनी आपली शिक्षणीक पात्रताय दाखोवपा खातीर बनावट शिक्षणीक संस्थांच्या प्रमाणपत्रांचो वापर केला. बनावट प्रमाणपत्रांच्या आदाराचेर तांकां नोकरी आनी हेर सुविधा मेळ्ळ्यात. ह्या कर्मचार्यांचेर चवकशी करून तांचेर खर कारवाय करपाची मागणी कॉंग्रेसीच्या शिश्टमंडळान केल्या. हे विशीं तांणी बुधवारा मंत्री नीलकंठ हळर्णकार हांकां मेळून निवेदन दिलें. ह्या वेळार साविओ डिसिल्वा, वीरेंद्र शिरोडकार, अर्चित नायक आनी हेर पदाधिकारी हाजीर आशिल्ले.
डिसिल्वा हांणी माध्यमां कडेन उलयतना म्हणलें, खात्यांतल्या दोगां कर्मचार्यांनी झारखंडचे एके शिक्षण संस्थेची प्रमाणपत्रां जोडून नोकरी मेळयिल्ली. ही शिक्षण संस्था अस्तित्वात नाशिल्ल्याचें ह्यान पयलींच स्पश्ट जालां. हे विशीं एका प्रकरणांत सर्वोच्च न्यायालयानूय निकाल दिला. ह्यान पयलीं आमी जानेवारी म्हयन्यांत हें प्रकरण भायर काडिल्लें. तशेंच हे विशीं दक्षता खात्या कडेन कागाळूय दिल्ली. दक्षता खात्यान नुस्तेंमारी खात्याक हे विशीं एका म्हयन्यांत जाप दिवची अशें सांगिल्लें. मात एक म्हयनो जालो तरी आमकां हाची जाप मेळूंक ना. हाका लागूनच आयज आमी मंत्र्याक मेळपाक आयिल्ले.
मंत्र्यांनी आमकां फुडल्या आठ दिसांनी कारवाय करपाचें आस्वासन दिलां. कारवाय जर जावंक ना जाल्यार आमी फुडल्या मार्गाचो विचार करतले. खात्यांतले हे दोन कर्मचारी सर्व्हेक्षक म्हणून जायतीं वर्सां जाले काम करतात. तांणी बनावट प्रमाणपत्रांच्या आधारार नोकरी, पगार, बढती मेळयल्या. राज्यांत बेरोजगारी वाडत आसा. पदंवीधर तरणाटे नोकरी नाशिल्ल्यान घरा बसल्यात. अशा वेळार बोगस प्रमाणपत्रांच्या आधारार नोकरी मेळोवपी ह्या कर्मचार्यांक लागून पात्र उमेदवारांचेर अन्याय जाला.
हाका लागून त्या दोन कर्मचार्यांवर कारवाय जावंकूच जाय अशी मागणी डिसिल्वा हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
