भांगरभूंय | प्रतिनिधी
वेवासायीक सिलिंडराच्या उणावाक लागून पर्यटन मळाक फटको
पणजीः इंधन नाशिल्ल्यान गोंयभर भंय पातळ्ळा. गोंयांत पेत्रोलाचो उणाव जायत म्हूण लोकांनी पेत्रोल पंपाचेर घिट्टी करून इंधन सांठोवपाक सुरवात केल्या. मजगतीं दर्यादेग वाठारांनी वेवसायीक सिलिंडराचो सामकोच उणाव दिसून येता. चडश्या रॅस्टोरंटांनी आतां चुलीर रांदप सुरू केलां.
आखाती देशांत चलिल्ल्या झुजाचे फाटभूंयेर प्रधानमंत्री नरेंद्र मोदी हांणी लाॅकडावन सारकी स्थिती जावपाची शक्यताय उक्तायले उपरांत सगळे लोक पॅनिक मोडार गेल्यात. काल राती सावन लोकांनी पेत्रोल पंपाचेर वचून पेत्रोल आनी डिजेलाचो सांठो करपाक सुरवात केली. लोकांनी मोदी हांच्या उलोवपाचो भलतोच अर्थ घेतला, अशी प्रतिक्रियाय कांय जाणांनी दिल्या. गोंयांत मात पसून गॅस, पेत्रोलाचो उणाव ना, अशेंय तांणी सांगलें.
पर्यटकां कडल्यान इंधन साठोवपाक सुरू
फाटले दोन दीस जाले राज्यांत पर्यटकांची संख्या व्हडा प्रमाणांत वाडल्या. डिसेंबर म्हयन्या परस चड पर्यटकांची गर्दी फाटले दोन दीस पळोवपाक मेळटा. हे फाटभूंयेर पर्यटकांनी आपल्यो गाडयो घेवन पेत्रोल पंपाचेर गर्दी केल्या. गोंयांत पेत्रोल सवाय आशिल्ल्यान कांय महाराष्ट्र आनी कर्नाटकाचे पर्यटक आपले खाजगी गाडये भितर तीन चार व्हडले कॅन भरून घेवन गेल्यात. कळंगुटे सारकिल्ले दर्यादेग वाठारांनी पेट्रोल पंपांनी सामकी घिट्टी पडिल्ली आनी पेत्रोल पंपा भायर रस्त्याचेर १०० मीटर मेरेन गाडयांचो राको लागिल्ल्यो. हातूंत खास करून पर्यटकांचो आस्पाव आशिल्लो.
पर्यटन क्षेत्रा मुखार सिलिंडर उणावाचें आव्हान
फक्त वट्ट कोटा मदले २० टक्के सिलिंडर दिवप सद्या सुरू आशिल्ले कारणान रेस्टोरेंट धनया मुखार संकश्ट उबें रावलां. सद्या दर्यादेगो फुल्ल भरल्यात आनी रेस्टोरंटांनी गर्दी आसा. हे गर्देक लागून तांकां मेळिल्ले कोटांतले सिलिंडर लेगीत सोंपल्यात. कांय जाणांनी एक सिलिंडर रु. ५ हजार इतले दिवन ब्लॅकांत विकते घेतल्यात. पुण नागरी पुरवण खात्यान बडी मारिल्ल्यान ब्लॅकांत सिलिंडर विकते घेवप कुस्तार जावन पडलां.
हे फाटभूंयेर जे मुखेल पदार्थ आसात जशे की बिरयाणी, दाळ, शित, रसम हे चुलीर रांदपाक रॅस्टोरंट धनयांनी सुरू केलां. तशेंच इडली, सामोसा, भाजी हांचे दर वाडल्यात. फक्त एका खेपे रांदपी पदार्थ जशे की बिरयाणी, शिवराक थाळी, नुस्त्याची थाळी रेस्टोरंटानी मेळप चालू आसा. गॅसाचो चड इबाड जावचो न्हय हे खातीर स्टार्टस पदार्थ बंद जाल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
