भांगरभूंय | प्रतिनिधी
पणजी : ‘रेंट अ कार’ ऑपरेटर पर्यटकांक त्रास दितात अश्यो कागाळी येतात. ह्यान फुडें असल्यो कागाळी आयल्यार कारवाय करतले, अशी शिटकावणी मुरगांव विभागाचे पुलीस उपअधीक्षक गुरुदास कदम हांणी दिली. ते दाबोळे पुलीस स्टेशनांत ‘रेंट अ कार’ ऑपरेटरांचे बसके वेळार उलयताले. ह्या वेळार हेर पुलीस अधिकारीय हाजीर आशिल्ले.
गोंयांत येवपी पर्यटक आपले सोयी खातीर ‘रेंट अ कार’ घेतात आनी भोंवून जाले उपरांत विमान धरपाच्या वा वचपाचे गडबडींत आसतना ‘रेंट अ कार’वाले गाडी परत करतना तांकां सतायतात, अश्यो कागाळी आपल्या कडेन आयल्यात. डिपॉझीट दवरिल्ली रक्कम परत दिवप ना वा चड पयशे मागप अशे तरेन तांकां त्रास दिवपाचे प्रकार चालू आसात, अशें उपअधीक्षक कदम हांणी सांगलें.
वचपाचे गडबडीन पर्यटक डिपॉझीट सोडून वा चड पयशे दिवन वतात. मात, गेल उपरांत ते गोंयचें नांव पेड्यार करतात आनी टॅक्सीवाल्यांनी कशे तरेन लुटले हाची म्हायती सगल्याक पातळटात. पोर्टलार कागाळीय करतात. हाका लागून गोंयच्या पर्यटनाचें बरें नांव पेड्यार जाता आनी हाचो फटको टॅक्सी वेवसायाचेरूच बसतलो, अशें उपअधीक्षक कदम हांणी हे बसकेंत समजावन सांगून, ह्यानफुडें अशे तरेच्यो कागाळी आयल्यार खर कारवाय करतले अशे शिटकावणी तांणी दिली.
‘रेंट अ कार’चे धनी अशे वागना आसतले, मात गाडी पळोवपा खातीर दवरिल्ले मनीस आपल्या ‘पॉकेट मनी’ खातीर पर्यटकां कडल्यान चड पयशे मागतात आनी तांकां त्रास दिल्ल्यान अशे प्रकार घडटात. अशे तरेच्यो कागाळी ह्यान फुडें आयल्यार धनयांचेरूय कारवाय करतले अशी शिटवावणी तांणी दिली.
‘रेंट अ कार’ ऑपरेटरांनी दाबोळे विमानतळार चड वेळ थारून विमानतळ प्राधीकरणाचे शुल्क भरून वेवसाय करपी टॅक्सी चालकांच्या वेवसायांत अडखळ हाडची न्हय. तशें दिसून आयल्यार कारवाय करतले, अशीय शिटकावणी तांणी दिली.
ह्या वेळार ‘रेंट अ कार’ ऑपरेटर संघटणेन आपले म्हणणें मांडलें.
मजगतीं, गोंयांत येवपी पर्यटकांनी सोरो पियेवन वाहनां चलोवचीं न्हय. नगम पाळून वाहनां चलोवचीं, असो उलोय उपअधीक्षक गुरुदास कदम हांणी ह्या वेळार मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
