भांगरभूंय | प्रतिनिधी
अली खान खून प्रकरण
मडगांव: घोगळ- फातोड्ड्यां सुन्नी गुलिस्तान मशिदीचे उपाध्यक्ष अली खान हांच्या हत्या प्रकरणांत आनीक एका दुबाविताक अटक केल्या. खूबशा दिसां सावन फरार आशिल्ल्या अल्ताफ शाह सय्यद हाका बंगळुरू विमानतळार ताब्यांत घेवन अटक केली.
फातोड्डें पुलिसांनी अली खान प्रकरणांत तपासा वेळार फरार आशिल्लो दुबावीत अल्ताफ हो दुबय सावन भारतांत परतून येत आशिल्ल्याची म्हायती मेळ्ळी. उपरांत पुलिसांनी सांपळो रचून ताका बंगळुरू विमानतळा वेल्यान ताब्यांत घेतलो. ह्या खून प्रकरणातं अटक केल्लो हो णववो दुबावीत आसा.
फातोड्डेंचे पुलीस निरिक्षक दितेंद्र नायक हांणी दिल्ले म्हायती प्रमाण दुबावीत अल्ताफाक बंगळुरू विमानतळार ताब्यांत घेतला आनी ताचो ताबो घेवपा खातीर पुलिसांचो एक पंगड बंगळुरू गेला.
30 जानेवारी 2026 दिसा नामाजा उपरांत मशीद समितीच्या वर्चस्वाच्या वादांतल्यान अली खान हांचेर चाकवान हल्लो जाल्लो. गंभीर जखमी जाल्ले अली खान हांकां हातूंत मरण आयलें. खून प्रकरणांत कट रचपाक वांटेकार आशिल्ल्या अल्ताफ खुनाच्या घडणुकेच्या दोन दिसा आदींच दुबय गेल्लो. जेणे करून ताचो ह्या गुन्यांवा कडेन संबंद आसुये असो दुबाव पुलिसांक आसा.
पुलिसांनी हाचे पयलीं ह्या प्रकरणांत मुखेल दुबावीत अक्रम खान हाचे सयत साहील कन्वी, आलम सय्यद, लतीफ सय्यद, उबेद्दुला मकानदार, सक्रुद्दीन शेख, हुसेन खान, निजामुद्दीन सय्यद अशा आठ जाणांक अटक केल्या. सद्या मुखेल दुबावीत अक्रम खान आनी साहील कन्वी न्यायालयीन कोठयेंत आसात. जाल्यार हेर कांय जाणांक जामीन मंजूर जाला.
ह्याच प्रकरणांत सर्फराज मकानदार आनी मेहबूब मकानदार ह्या दोन भावांचो अटकपूर्व जामीन न्यायालयान पयलींच भायरायिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
