भांगरभूंय | प्रतिनिधी
पणजी : वंदे मातरम ह्या राष्ट्रीय गीताक १५० वर्सां पुराय जावपाच्या एतीहासीक खिणा निमतान फाल्यां २५ मार्चाक सरकारी कार्यालयां तशेंच शिक्षणीक संस्थांनी परतून वंदे मातरमचे सामुहीक गायन जातलें. सरकारी कार्यालयां, शिक्षणीक संस्था, पंचायती, नगरपालिकां सयत भौशीक थळांचेर २५ मार्चाक सकाळीं १०.१५ वरांचेर वंदे मातरमचें गायन करचें असो आदेश सर्वसादारण प्रशासन फाट्यान जारी केला.
बंकीमचंद्र चटर्जी हांच्या वंदे मातरम गीताक १५० वर्सा पुराय जातात. ह्या निमतान ७ नोव्हेंबर २०२५ ते ७ डिसेंबर २०२६ मेरेन वर्सभर कार्यावळी करपाचो निर्णय केंद्र सरकारान घेतला. कार्यावळींचे पयले दोन पावंडे जाल्या उपरांत आतां २३ मार्च ते ३० मार्च २०२६ मेरेन तिसरो पावंडो जातलो. शहीद दिसा निमतान परत वंदे मातरमचे सामुहीक गायन करपाचे आदेश केंद्रान दिल्यात. हाका लागून फाल्यां २५ तारखेक सरकारी कार्यालयां तशेंच शिक्षणीक संस्थांनी वंदे मातरमचें सामुहीक गायन जातलें. गायनाची ध्वनीफित वंदे मातरम वेबसायटीचेर उपलब्ध आसा.
फोटे सयत कार्यवाहेचो अहवाल २ एप्रील २०२६ मेरेन कला आनी संस्कृती संचालनालयाक इमेलीचेर धाडून दिवप गरजेचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
