भांगरभूंय | प्रतिनिधी
पणजी : फोंडें पोटवेंचणुके विशीं गोंयच्या मुंबय उच्च न्यायालयांत दाखल जाल्ल्या दोन याचिकांवेली फुडली सुनावणी न्यायालयान सोमारा ३० मार्चाक दवरल्या. ह्यो दोनूय याचिका मंगळारा सुनावणेक आयल्यो तेन्ना भारतीय वेंचणूक आयोगाच्या वकिलांनी वेळ मागून घेतलो. हाका लागून आयची सुनावणी तहकूब केली.
आतांच्या विधानसभेची पांच वर्सांची मुजत सोंपल्यार एका वर्सा परस उणो कार्यकाळ उरला. एका वर्सा परस उणो कार्यकाळ आसल्यार पोट वेंचणूक घेवपाक मेळना असो मुद्दो याचिकादारां वतीन न्यायालयांत हाजीर केलो. ताचेर भारतीय वेंचणू निवडणूक आयोगाच्या वकीलांनी युक्तीवाद करपा खातीर वेळ मागून घेतलो. हाका लागून आयची सुनावणी तहकूब केली. फुडली सुनावणी ३० मार्चाक जातली. ह्या प्रकरणांत प्रितम हरमलकार आनी अंकिता कामत ह्या दोगांनी दोन याचिका दाखल केल्यो.
मजगतीं, फोंडें विधानसभा पोटवेंचणूक ९ एप्रिलाक जातली. तिगांनीय उमेदवारी अर्ज भरून प्रचाराकूय सुरवात केल्या. हे फाटभूंयेर गोंयच्या उच्च न्यायालयांत दाखल जाल्ल्या दोन याचिकांचेर न्यायालयाच्या निकालाकडेन सगल्यांचें लक्ष लागलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
