भांगरभूंय | प्रतिनिधी
म्हायती, वळख गुपीत दवरतले : पुलीस अधीक्षक संतोष देसाय
पणजी : कुडचडच्या लैंगीक अत्याचार प्रकरणांत नवीनवी म्हायती मुखार येता. हाका लागून बरोच बोवाळ निर्माण जाला. ह्या प्रकरणांत आनीक कोण पिडेस्त आसल्यार तांणी कागाळ दिवपाक मुखार येवचें. कागाळदारांची म्हायती सामकी गुपीत दवरतले. तशेंच तांकां पुरायेन संरक्षण दितले, अशें दक्षीण गोंय जिल्लो पुलीस अधीक्षक संतोष देसाय हांणी सांगलें.
विरोधी राजकी पक्षांच्या चेंपणाक लागून काल लैंगीक अत्याचार प्रकरणांत ‘पोक्सो’ आनी गोंय बाल कायद्या खाला खर कलमां लायिल्लीं. ह्या प्रकरणांत अटक केल्ल्या सोहम नायक हाका चार दिसांची पुलीस बंदखण घेवन पुलिसांनी तपासाक आनीक वेग दिला. हे फाटभूंयेर पुलीस अधीक्षक संतोष देसाय हांकां पत्रकारांनी विचारलें तेन्ना तांणी ही म्हायती दिली.
ह्या प्रकरणांत कागाळ दिवपी पिडेस्त आनी हेरांच्यो जबान्यो घेवप सुरू आसा. पिडेस्तांचे पिरायेचीय तपासणी करतले. ह्या प्रकरणाचो खोलायेन तपास करतले. तपासांत जशी नवी म्हायती मुखार आयल्यार, गरज पडल्यार ह्या प्रकणांत आनीक कलमांचो आसपाव करतले वा नवो एफआयआरूय नोंद करतले अशें श्री. देसाय हांणी सांगलें.
मजगतीं, ह्या प्रकरणांत लैंगीक अत्त्याचाराक बळी पडिल्ल्यो चलयो नेण्टे पिरायेच्यो (१८ वर्सां सकयल्यो) आशिल्ल्यान बरोच बोवाळ जाला. वट्ट प्रकरण मुखार आयले उपरांत पुलिसांनी पुरावे नाशिल्ल्याचें कारण मुखार करून आनी कागाळ करूंक कोणूच येवंक नाशिल्ल्याचें सांगून गुन्यांव नोंद करपाक न्हयकारलें. मात ताचे उपरांत कुडचडेंचे थळावे आनी कांय नगरसेवकांनी एकठांय येवन कुडचडें पुलीस स्टेशनाचेर मोर्चा हाडून ह्या प्रकरणांत ४८ वरां भितर गुन्यांव नोंद करून आरोपीक अटक करिना जाल्यार आंदोलन करपाची शिटकावणी दिल्ली. उपरांत पुलिसांनी गुन्यांव नोंद करून सोहम नायक हाका अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
