भांगरभूंय | प्रतिनिधी
महिला कॉंग्रेस अध्यक्ष प्रतिक्षा खलप हांची मागणी
पणजी: कुडचड्यां घडिल्ल्या लैंगीक अत्याचार प्रकरणांतल्या आरोपीची फाटभूंय प्रभावी आसा. देखून हे प्रकरणाची स्वेच्छा दखल घेवन विशेश तपास पथका वरवी हाची चवकशी जावची, अशी मागणी महीला कॉंग्रेस अध्यक्ष प्रतिक्षा खलप हांणी केल्या.
पणजे गोंय राज्य महिला आयोगाक निवेदन सादर केल्या उपरांत प्रसारमाध्यमां कडेन उलयतना डॉ. खलप हांणी या प्रकरणाच्या गंभीरतेचेर भर दिलो. ह्या प्रकरणांत २० वर्सांच्या सोहम नायक ह्या दुबाविताक पुलिसांनी ताब्यांत घेतला. ताचेर ल्हान चलयांचे अश्लील व्हिडियो प्रसारीत केल्ल्याचो आरोप आसा. हो गुन्यांव फक्त एका व्यक्ती पुरतो मर्यादीत नासून, हातूंत आनीकय आरोपी आसपाची शक्यताय डॉ. खलप हांणी उक्तायली.
गोंयच्या बायलांच्या कागाळी निवारण यंत्रणेच्या सद्याचे परिस्थितीचेर डॉ. खलप हांणी गंभीर चिंता उक्तायली. महिला आयोगाची मुदत ह्याच म्हयन्याचे सुरवेक सोंपल्या, देखून अशा गंभीर वेळार आयोग बिनकामी जाला, अशें ताणीं सांगलें. अशा गंभीर विशयांचेर उपाय करपाक सद्या खंयचोच सक्रीय मंच ना, अशें ताणीं सांगलें.
आयोगाचें काम रोखडेंच सुरू जावचें आनी ह्या प्रकरणांत स्वेच्छा दखल घेवन खास तपास आनी पिडित आदार समिती स्थापन करची, अशी मागणी महिला कॉंग्रेसच्या शिष्टमंडळान केली. तशेंच, पुलिसांकडेन मेळ घालून या प्रकरणाची सखोल तपासणी जावची, अशें तांणी मागलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
