भांगरभूंय | प्रतिनिधी
पणजी : फोंडें मतदारसंघा खातीर जावपी पोट निवडणुकेक अर्ज भरपाची निमाणी मुजत सोमारा सोंपली. हे सुवाते खातीर डॉ. केतन भाटीकार, रितेश नायक आनी गीतेश नायक हांणी अर्ज भरले. उमेदवारांनी सादर केल्ल्या प्रतिज्ञा पत्रा प्रमाण डॉ. केतन भाटीकार हे सगल्यांत गिरेस्त उमेदवार थारल्यात. तांचे कडेन सुमार ४.८८ कोटींची स्थावर आनी जंगम स्वरूपाची मालमत्ता आसा. रितेश नायक हांणी १.५५ कोटी रुपय, जाल्यार गीतेश नायक हांणी सुमार ३.२० कोटी रुपयांची मालमत्ता प्रतिज्ञा पत्रात जाहीर केल्या.
प्रतिज्ञा पत्रा प्रमाण कॉंग्रेस उमेदवार डॉ. केतन भाटीकार हांणी १.०८ कोटी रुपयांची जंगम मालमत्ता जाहीर केल्या. हातूंत धा बँक खात्यांतली ठेवी, गुंतवणुको, वाहनां, दोन चारचाकी आनी एक दुचाकी वाहन, चार तरेच्यो भांगरा वस्ती अशे गजालींचो आसपाव आसा. जाल्यार स्थावर मालमत्तेंत बिगर कृषी जमीन, वेवसायीक गाडे, फ्लॅट आदींचो आसपाव आसा. ह्या सगल्याची किंमत ३.८० कोटी रुपया आसा. डॉ. भाटीकार १.२९ कोटी रुपया दिवपाचे आसात. तांणी २०२४- २५त आयकर भरताक वर्सुकी उत्पन्न १३.२५ लाख आशिल्ल्याचें नमूद केलां.
भाजपाचे उमेदवार रितेश नायक हांणी १.५५ कोटी रुपयांची जंगम मालमत्ता जाहीर केल्या. हातूंत रोख रक्कम ५२ हजार रुपया, बँक ठेवी ७ लाख रुपया, म्युच्युअल फंडांतली ७ लाख रुपया, पोस्ट आनी तत्सम गुंतवणूक १.८८ लाख रुपया, जाल्यार भांगरा वस्ती १.३८ कोटी रूपयांच्यो आशिल्ल्याचें नमूद केलां. तांच्या नांवार स्थावर मालमत्ता नाशिल्ल्याचें प्रतिज्ञा पत्रात नमूद केलां. तांणी २०२४- २५त आयकर भरताक वर्सुकी उत्पन्न १५.४६ लाख आशिल्ल्याचें नमूद केलां.
आम आदमी पक्षाचे उमेदवार गीतेश नायक हांणी सुमार २.९३ कोटी रुपयांची जंगम मालमत्ता जाहीर केल्या. हातूंत तांच्या बायलेच्या नांवार आशिल्ले मालमत्तेचोय आसपाव आसा. हातूंत चार बँक खात्यांतली ठेवी, रोख रक्कम, एक चार चाकी, १२२ ग्रॅम भांगरा वस्तींचो आसपाव आसा. जाल्यार स्थावर मालमत्तेच्या प्लॉटाचो आसपाव आसा.
गीतेश नायक सुमार २२.१९ कोटी रुपया दिवपाचे आसात. २०२४- २५ वर्सा आयकर भरतान वर्सुकी उत्पन्न १०.९२ लाख आशिल्ल्याचें नमूद केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
