भांगरभूंय | प्रतिनिधी
पणजी : भाजपान लोकशायेचो खून केल्ल्याचो आरोप करून अशा जनविरोधी पक्षाचे तावडेंतल्यान गोंयांक वाटावपा खातीर म्हाका विख जरी पिवचें पडलें तरी ते खातीर हांव तयार आशिल्ल्याचें युरी आलेमाव हांणी सांगलें. फोंडें विधानसभा पोटवेंचणुके खातीर डॉ. केतन भाटीकर हांणी उमेदवारी अर्ज दाखल केलो. उपरांत माध्यमां कडेन उलयतना भाजप सरकाचेर युरी हांणी ही खर टिका केली.
भाजप सरकार दादागिरी आनी शासकीय यंत्रणेचो गैरवापर करता. भाजप कार्यकर्त्यांक प्रशासकीय इमारतींत प्रवेश दितात, जाल्यार कॉंग्रेस कार्यकर्त्यांक मुद्दम आडायतात, अशें तांणी म्हणलें.
आदले मुख्यमंत्री रवी नायक हांच्या दायजाचो उल्लेख करीत तांणी ते बहुजन, कुळमुंडकार आनी सामान्य लोकांच्या बर्या खातीर वावुरिल्ले फुडारी आशिल्ले. हिच कॉंग्रेसची विचारधारा आनी आमी ती मुखार व्हरतले. फोंडें कॉंग्रेस सरकारांनी केल्ले उदरगतीक लागून आमी ही सुवात जिखतलेच असो विस्वासूय तांणी ह्या वेळार दाखयलो.
रेव्होल्युशनरी गोवन्स पार्टीच्या तेंक्या विशीं उलयतना तांणी उपकार आटयले. हो जैताचो फॉर्म्युला थारतलो. तांच्या फाटबळाक लागून भाजपाक हारोवपाक मजत जातली अशें युरी आलेमाव हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
