भांगरभूंय | प्रतिनिधी
जनगणनेच्या कामाविशीं शिक्षकांक प्रशीक्षणूय दितले
पणजी : जनगणनेच्या पयल्या पावंड्याच्या कामा खातीर शिक्षकांक २५ हजारांचे मानधन मेळटले. मुळाव्या शाळेंतले शिक्षक इनुमरेटर म्हूण काम करतले जाल्यार विद्यालयीन शिक्षक पर्यवेक्षक (सुपरवायजर) म्हूण काम करतले. सुपरवायजरांक ३० हजारांचे मानधन मेळटले. डिजीटल पद्दतीन घरांची जनगणना जातली. मोबायल मात शिक्षकांक स्वताचे वापरचे पडटले. सरकारी अधिकार्यां कडल्यान ही म्हायती मेळ्ळी.
१६ एप्रील ते १५ मे मेरेन जनगणनेचो पयलो पावंडो जातलो. घरांक भेटी दिवन डिजीटल पद्दतीन म्हायती एकठांय करपाचो वावर मुळावे शिक्षक करतले. ६ शिक्षकांचेर एक पर्यवेक्षक आसतलो. दर दिसा शिक्षकांक आपल्या कामाचो अहवाल सुपरवायजराक सादर करचो पडटलो. सुपरवायजरांवेर मुखेल अधिकारी आसतलो. गावगिर्या वाठारातल्या जनगणना वावराचो त्या म्हालाचो मामलेदार मुखेली आसतलो. शारी वाठारातल्या जनगणना वावराचो म्हालाचो उपजिल्होधिकारी मुखेली आसतलो. उत्तर गोंयचे जिल्होधिकारी अंकीत यादव हांणी ही म्हायती दिली.
सांख्यिकी खात्याच्या दोन अधिकार्यांनी जनगणनेविशी उचेल्या पावंड्यावेले प्रशीक्षण घेतला. सध्या मास्टर ट्रेनरां खातीर प्रशीक्षण सुरू आसा. उत्तर गोंयांत २२ जाल्यार दक्षीण गोंयांत २८ मास्टर ट्रेनर आसतले. हे मास्टर ट्रेनर शिक्षकांक प्रशीक्षण दितले. जनगणनेची म्हायती मोबायलाचेरूच भरची पडटली. ज्या जाग्यार रेंज ना, थंय मात म्हायती हातीन बरोवन घेवची पडटली.
जनगणना दरेकी धा वर्सांनी जाता. हेच खेपो कोरोनाक लागून जनगणनेक उशीर जालो. गोंयांतूच न्हय जाल्यार हेर राज्यांनी लेगीत शिक्षकांवरवींच जनगणनेचो वावर जाता. सुटी आशिल्ल्यान तशेंच कामाचो उणो ताण आशिल्ल्यान शिक्षकांचीच नेमणूक जनगणनेच्या वावरा खातीर जातली, अशें उत्तर गोंयचे जिल्होधिकारी अंकीत यादव हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
