भांगरभूंय | प्रतिनिधी
पणजी : कदंब महामंडळान पणजे इलॅक्ट्रीक बस चलोवपा खातीर ईव्ही ट्रान्स हे कंपनी वांगडा रार केला. ही कंपनी बस चालकांक फकत १७ ते १८ हजार रुपया वेतन दिता. सध्याची म्हारगाय पळयल्यार हो पगार सामको उणो आसा. अखिल भारतीय ट्रेड युनियन कॉंग्रेसीचे अध्यक्ष क्रिस्टोफर फोन्सेका हांणी ह्या बस चालकांचो पगार म्हयन्याक उणोच उणो ३० हजार रुपया मेरेन वाडोवचो अशी मागणी केल्या. सोमारा पणजे जाल्ले पत्रकार परिशदेंत ते उलयताले. ह्या वेळार कदंब चालक आनी संबंदीत कर्मचारी संघटणेचे पदाधिकारी हाजीर आशिल्ले.
फोन्सेका हांणी म्हणलें, ई बस चालकांक हक्काच्यो रजा दिवपाक जाय. तांकां वेळार ओव्हर टायम मेळप गरजेचें. सरकारान कंपनीच्या खर्चाची रक्कम वाडयल्या. ह्यान पयलीं ही कंपनी ७६ रुपया प्रति किलोमीटर ह्या दरान काम करताली. आतां ते वाडोवन दर किलोमिटराक ८६ रु. केल्यात. अशें आसूनय कामगारांचो पगार कित्याक वाडना हाची जाप मेळप गरजेचें. खरें म्हणल्यार इलेक्ट्रीक बस ही कदंबाच्या खाजगी करणाची सुरुवात. कदंबा वतीन हेर कामांय आवटसोर्स करतात. हें महामंडळ बंद करून खाजगी कंपनीच्या हातांत दिवपाचो यत्न सुरू आसा.
कदंबाच्यो २५० परस चड बशी स्क्रॅप जाल्यात. अशे परिस्थितींत उण्या अंतराच्यो ईव्ही बशी घेवचे बदला लांब अंतराच्यो ३०० डिझेल बशी विकत्यो घेवच्यो. सातव्या पगार आयोगाची अंमलबजावणी जाले उपरांत लेगीत कर्मचार्यांची थकबाकी अजून फारीक जावंक ना. आदले बसकेंत सरकारान ही मागणी मान्य करपाचें उतर दिल्लें. पूण एक वर्स जालें तरी हाचेर कसलीच कारवाय जावंक ना. आमी परत एक फावट सगल्या कामगारां मदीं हे संबंदी जागृताय करतले. आमची चळवळ चालूच उरतली. कामगारां कडेन चर्चा करून धरणें आंदोलनाची फुडली दिका थारायतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
