भांगरभूंय | प्रतिनिधी
सावंतवाडी: महाराष्ट्र आनी गोंयच्या शीम वाठारांत फाटल्या कितल्याशाच म्हयन्यां सावन भंय निर्माण करपी ’ओंकार’ हती आतां सावंतवाडी म्हालांतल्या नेतर्डे वाठारांत पावला. विशेश म्हळ्यार, आयतारा दनपरां हो हती पेडणेंच्या हणखणे वाठारांत दिसून आयिल्लो. थंयच्यान तांणी परत महाराष्ट्राचे हद्दींत प्रवेश केला. सध्या कोकणांत काजू, आंब्याचें पीक रसरसपाक लागलां. अंदूं बरें पीक येतलें अशी आस्त धरून आशिल्ले बागायतदार आनी शेतकार ह्या वाठारांत हतयाच्या वावराक लागून सामे भियल्यात. तांचे मुखार अर्थीक संकश्ट तशेंच जिवाचोय धोको निर्माण जाला.
’ओंकार’ हतयाचो संचार गोंय-महाराष्ट्र शीम वाठारांत आसा. रान खात्याच्या २५ कर्मचार्यांचो पंगड तांचे हालचालींचेर नदर दवरून आसा. तो आपूण जावन मूळ सुवातेर वचूंक ना, आदले भशेन ताका धांवडायतले: जीस वर्की, उप रान संरक्षक
तीन म्हयन्यां उपरांत ओंकार हती परत पेडणेंच्या हणखणें वाठारांत परतल्ल्यान गोंय आनी महाराष्ट्र ह्या दोनूय राज्यांचे रान विभाग आतां हायअलर्टचेर आसात.
फाटल्या कांय म्हयन्यांचो आढावो घेतल्यार, ’ओंकार’ हतयान मोपा विमानतळ वाठारांत लोकां मदीं भरोच भंय घातिल्लो. उपरांत तो दोडामार्ग आनी सावंतवाडी म्हालाच्या शीम वाठारांत आपली सुवात बदलत आसा. हणखणे गांव महाराष्ट्र आनी गोंय ह्या दोनूय राज्यांचे शिमेर वसला. हतयाक ह्या दोनूय राज्यांनी यो-वच करपाक सोपें जालां. सध्या सावंतवाडी आनी दोडामार्ग ह्या दोनूय म्हालांच्या वाठारांत वट्ट स हती वावुरतात अशी म्हायती रान विभागान दिल्या. हातुंतलो पांच हतयांचो कळप तिळारी, खोर्यांत सक्रीय आसा, ’ओंकार’ मात एकलोच नेतर्डे आनी हणखणें वाठारांत भोंवता.
मजगतीं, ह्या हतयाक जेरबंद करपाचो निर्णय महाराष्ट्र शासनान ह्यान पयलींच घेतिल्लो. मात, ही पुराय मोहीम सध्या न्यायालयीन चपक्यांत आडकून आसा. एके समाजीक संस्थेन न्यायालयांत याचिका दाखल केल्ल्यान हतयाक धरपाची प्रक्रिया लांबायेर पडल्या. हातुंतूच नामनेचे ’वनतारा’ टिमीन ह्या हतयाक धरून व्हरपाक कांय थळाव्या पांवड्यार विरोध आशिल्ल्याचेंय मुखार आयलां. ह्या तांत्रीक आनी न्यायालयीन कारणाक लागून रान विभाग बांदून उरलां. जो मेरेन हे न्यायालयीन प्रक्रियेंतल्यान मार्ग काडिना तो मेरेन हतयाचो हो उपद्रव सुरूच उरतलो अशीं चिन्नां दिसून येतात. हे फाटभूंयेर, महाराष्ट्र शासनान रोखडेंच हस्तक्षेप करून ह्या संकटाचेर कायमचो तोडगो काडचो, असो उलो शेतकारांनी मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
