भांगरभूंय | प्रतिनिधी
नोटाबंदी, 2014 तले देशांतले नवे नेतृत्व आनी ताका लागून आतंकवादाक बशिल्लो जबरदस्त फटको भारतीय प्रेक्षकांक आवडटलो
फिल्म समीक्षा
भारत देशा सयत जायत्या देशांनी आंतरराष्ट्रीय स्तरावेले सिनेमामोगी ज्या सिनेमाच्या दुसऱ्या भागाची गेल्या डिसेंबर म्हयन्या सावन वाट पळयताले, त्या जसकिरत सिंग रांगी ह्या देशाक लागून बलिदान दिवपी गुप्तहेराच्या साहसान भरिल्ल्या “धुरंधर: धी रिव्हेंज” ह्या धुरंधर सिनेमाचो निमाणो भाग निकतोच प्रदर्शित जाला. हो लेख प्रकाशित जाय मेरेन ताची बॉक्स ऑफिसा वयली जोड 150 कोटी रूपयांचो आंकडो हुपतली अशें हांव ठामपणान सांगुंक शकतां. सिनेमाची अँडव्हान्स बुकिंग 40 कोटी रूपयां वयर गेली आनी प्रदर्शनाच्या पयलीं “पेड प्रिव्ह्यू” ह्या पयशे भरून प्रदर्शनपूर्व खेळ पळोवपाक दाखयल्लो उत्साह पळोवन जायते फिल्ममोग्यांक कथानकाचे फुडल्या भागा विशीं आशिल्ली उमळशीक पळोवंक मेळ्ळी. सिनेमा देशांत 600 ते 700 कोटींचो आंकडो पार करतलो अशें दिसता. कांय जाणकारांच्या मतान 1200 कोटींच्या मुखारुय वचपाक शकता. दक्षिणात्य आणि हिंदी सिनेमांनी धुरंधराचे दुसऱ्या भागाची दहशत घेवन आपापल्या फिल्मांची प्रदर्शनां फुडें धुकलली, हातुंतच सिनेमाचे वातावरण कितलें गरम जाल्लें, तें कळटा.
कथानक कितें?
पयल्या सिनेमात दाखयल्ल्या जसकीर्त सिंह रंगी हाचो गुप्तहेर म्हूण पाकिस्तानचे अंडरवर्ल्ड आनी दहशतवाद्यांचें भितरलें नेटवर्क हातूंत जाल्लो प्रवास हे कथेत फुडें वतना ताचे पाकिस्तानी कराची गँगस्टर सरदार हमजा अली मजारी हातूंत जाल्लें रूपांतर, टोळ्यांचे नेतृत्व, पाकिस्तानांतल्या राजकारणांत व्हड दिग्गज व्यक्ती जावन राजकी नेते, डॉन हांचे संयत जावपी उठबस, खनानी ब्रदर्स हांची बनावट चलनी नोटांची तस्करी आनी नेटवर्क, भारतांत नकली चलन घुसोवन अर्थवेवस्था खिळखिळी करपाचो यत्न, दहशतवादी कटकारस्थान, भारतांत विविध राज्यांनी जाल्ले बॉम्बस्फोट आनी भारतीय यंत्रणांक जाय आशिल्ले दुबावीत आतंकवादी हांच्यो हत्या असो प्रवास दुसऱ्या भागांत पळोवपाक मेळटा.
जबरदस्त संशोधन करून बांदिल्ली पटकथा, साहस आनी हाणामारीची दृश्यां, वास्तविक घडामोडी जशे 2016 सालांतली नोटबंदी, 2014 सालांत देशाचे भौमानेस्त प्रधानमंत्री नरेंद्र मोदी हांणी सोपूत घेवप आनी पाकिस्तानी आतंकवादी सामके वैफल्यग्रस्त जावप, मुंबय अंडरवर्ल्डाचो डॉन आनी 1993 सालांत मुंबई बॉम्बस्फोटाचे हल्ल्यातलो मुखेल आरोपी आशिल्ल्या कुख्यात गुन्हेगाराचें वास्तविक दर्शन ह्यो सगल्यो गजाली प्रेक्षकांक हादरे दितात. “बडे साहब” हाचो संदर्भ पयल्या भागात प्रेक्षकांक मेळिल्लो तो बडे साहब कोण हे ह्या भागात पळोवपाक मेळटले आनी धपको बसतलो (हाचेर चड उलोवन हांव रसभंग करपी “स्पॉयलर” दिवंक शकना). जसकीरत हाणें जायत्या वर्सांनी आपल्याच भावोजीक वॉशरुमात मारप, एसपी चौधरी अस्लम हमजा हाका मारपाक पुलिसांचो ताफो धाडटा, पुण हमजा ताका चेकमेट करून अस्लम हाकाच वाहन अपघातात मानवी बॉम्ब वापरून मारप, आयएसआय आतंकवाद्यांनी भारताचेर शस्त्रां आनी सैन्य घेवन तयार केल्लो नियोजित हल्लो जसकिरत उर्फ हमजा हाणें बलोच आर्मीची मजत घेवन पाकिस्तानातूच उद्ध्वस्त करून वडयता ती क्लायमॅक्सातली चकमक आनी खडाजंगीची दृश्यां, जसकीरत आनी मेजर इक्बाल हांचे भितर निमाणे वेळार जावपी रक्तरंजित हाणामारी आनी जसकिरत आपल्या गांवांत वचून आपल्या कुटुंबाक दोळे भरून पळयता तें भावनिक दृश्य, हे सारकिल्ले प्रसंग प्रेक्षकांक सिनेमाघरात 3 तास 58 मिनिटां खिळोवन दवरपाक जैंतीवंत थारतात.
सिनेमा कित्याक पळोवचो?
रणवीर सिंग, सारा अर्जुन, अर्जुन रामपाल, राकेश बेदी, आर माधवन, गौरव गेरा, दानिश पंडेर हांणी आपापल्या भुमिकांनी जीव ओतलेलो आसा. भारतातले आतंकवादी हल्ले, नोटाबंदी, 2014 तले देशांतले नवे नेतृत्व आनी ताका लागून आतंकवादाक बशिल्लो जबरदस्त फटको भारतीय प्रेक्षकांक आवडटलो आनी तें सिनेमाघरांनी गर्दी खेचपाक जैतीवंत थारतलें. पोरण्या गीतांचो वापर प्रभावी जाला.
खयच्यो बाजू खटकतल्यो
सिनेमा “प्रपोगंडा फिल्म” आसा म्हूण लिबरल आनी दाव्या विचारसरणीच्या विचारवंत गटांनी टिका केल्या. मात हे चर्चेक मात्तूय अर्थ ना. तशें पळोवंक गेल्यार “मैं हु ना” “पठान”, एक था टायगर, टायगर जिंदा है , बजरंगी भाईजान हे सारकिल्ले बॉलिवूड चित्रपटूय प्रपोगंडा सिनेमाचोच भाग आसात, असो देशभक्तीची बाजू घेवपी उजव्या विचारसरणीच्या विचारवंतांचो तर्क आसा. ज्या मुद्द्या कडेन हांव व्यक्तिगत स्तराचेर पुराय सहमत आसा. ह्या सगल्या सिनेमांनी आयएसआय आनी रॉ (आर अॅण्ड डब्ल्यू भारतीय गुप्तहेर संघटना) हांची इश्टागत आनी पाकिस्तान हें भारताचे मित्रराष्ट्र दाखोवपाचो सामको देशविरोधी प्रपोगंडा दाखयला. धुरंधर माळेंतलीं कांय पात्रां काल्पनिक आसलीं तरीय प्रत्यक्षात घडिल्ल्यो राजकी घडामोडींचो संदर्भ घेवन तथ्यांचेर आधारित सत्यघटना दाखोवपाचो यत्न केला. सिनेमातल्या काय पात्रांचे भाशेंत अश्लील उतरांचो वापर केला. कांय प्रेक्षकांक तो खटकुंक शकता. पूण ताका इलाज ना. कारण आमी राजश्री प्राॅडक्शनाचो सुरज बडजात्याचो फॅमिली ड्रामा पळयनात, भारताच्या दुस्मानाक नरकाची तिकेट काडून दिवपी म्हान अशा जाट पंजाबी सिक्रेट एजन्टाची रक्तरंजित कथा पळयतात. सिनेमातली हिंसा आनी क्रौर्य पळोवप दर एकल्या प्रेक्षकाक पचतलेच हाचो विश्वास दिवपाक मेळना. कारण सिनेमा पळयतना काय प्रेक्षक मळमळून उठून गेल्ले हांवें पळयले. 15 वर्सा सकयल्या भुरग्यांक सिनेमा पळोवंक व्हरचें न्हय, ही म्हजी एक मनोचिकित्सक म्हूण कळकळीची विनंती.
रणवीर सिंह हांणी साकारिल्ले जसकीरत सिंह रंगी ही व्यक्तिरेखा काल्पनिक आसली तरीय ती भारताचे जायते देशभक्त लष्करी आनी गुप्तचर यंत्रणांचे ऑफिसर हांका ओपलेली एक श्रद्धांजली आसा. जे आपल्याचें जिवीत, वळख आनी कुटुंब हांचो त्याग करून शत्रूराष्ट्रात वचून भारताच्या विरोधात आशिल्ले आतंकवादी कट, हल्ले आनी तांचे भारतविरोधी मनसूबे आतंकवादी प्रशिक्षण केंद्रा सयत उद्ध्वस्त करून वडयतात. अशा सगले ज्ञात, अज्ञात वीर, वीरांगना आनी भारतमातेच्या सपुतांक काळजा सावन आर्गा. जय हिंद.
– सनतकुमार फडते
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
