भांगरभूंय | प्रतिनिधी
तेहरान: स्ट्रेट ऑफ हॉर्मुज च्यान बोटींक मार्ग दिवपा विशीं इराणान आपली भुमिका मवाळ केल्या. जोड राष्ट्रसंघांतल्या एका वरीश्ठ प्रतिनिधीन सांगलें, दुस्मान देशां कडेन संबंदीत नाशिल्ल्या सगल्या बोटीं खातीर ही दर्याची वाट उक्ती आसतली.
ही घोशणा डॉनल्ड ट्रम्प हांणी ४८ वरांनी हॉर्मुझ पुरायेन उक्ती करिना जाल्यार इराणच्या वीज प्रकल्पांचेर हल्लो करपाची धमकी दिले उपरांत कांय वरांनीच जाल्या. २२ देशांनीय तशी मागणी करपी आयज बरयिल्लें.
आंतरराष्ट्रीय समुद्री संघटणेंतले इराणचे प्रतिनिधी अली मौसावी हांणी आयतारा स्पश्ट केलें, इराणच्या दुस्मानां कडेन संबंदीत नाशिल्ल्यो बोटी तेहरान कडेन सुरक्षा आनी सुरक्षिततायेचे उपाय येवजण्यां विशीं समन्वय सादून दर्यांतले वाटेंतल्यान वचपाक शकतात.
दर्यावेल्या सुरक्षा आनी आखाती वाठारांतल्या दर्यावेल्या लोकांची राखण करपा खातीर इराण संयुक्त राश्ट्रांच्या एजन्सींक सहकार्य करपाक तयार आसा. मुत्सद्देगिरी इराणाचें प्राधान्य आसा.पूण आक्रमकता थारावप आनी परस्पर विस्वास निर्माण करप चड म्हत्वाचें अशें तांणी सांगलें.
इराणान २८ फेब्रुवारीक म्हत्वाचो उर्जा मार्ग बंद केलो. तेहरानान ‘अमेरिका, इझ्राएल आनी तांच्या इश्ट देशांक एकूय थेंब तेल वचूंक दिवचे नात’ अशीय शिटकावणी दिल्ली.
संवसारांतली सुमार २० टक्के तेल आनी द्रवीकृत सैमीक वायू (एलएनजी) पुरवण अरुंद दर्यांतल्यान वता.
नाटोचो न्हयकार
मजगतीं, ह्या मार्गांतल्यान वचपी बोटींची राखण करपा खातीर अमेरिकेंत नौदलाचें सैन्य तयार करपाचो यत्न सुरू आसा. पूण चडशा नाटो देशांनी इराणाआड लश्करी कारवाय करपाक आडखळ हाडल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
