भांगरभूंय | प्रतिनिधी
नवी दिल्ली: आतां एअरलायन कंपनी घरगुती विमानांचें भाडें सिटाचे मागणे मागणे प्रमाण वाडोवपाक शकतलें. नागरी विमान येरादारी मंत्रालयान हवाई भाड्यावेले निर्बंध काडल्यात. आदेशा प्रमाण, हो निर्णय २३ मार्च सावन लागू जातलो.
फाटल्या वर्सा डिसेंबराक इंडिगोच्या उड्डाणांत आयिल्ल्या आडमेळ्या उपरांत भाड्याची मर्यादा (फेअर कॅप) लागू केल्ली. सरकारान एअरलायन्सचे चडांत चड रु.१८००० निश्चीत केल्ले. एअरलायन्स हाचे परस चड दर घेवपाक शकनाशिल्ल्यो. आदेशांत म्हणलां, पुराय क्षेत्रांत उड्डाणांची तांक पयलीं भशेन जाल्या आनी कामकाज सामान्य जालां. नियाळ घेतले उपरांत २३ मार्च २०२६ सावन भाड्याचेर घाल्ली मर्यादा काडून उडोवपाचो निर्णय घेतला.
खरें म्हणल्यार फाटल्या वर्सा डीजीसीएन पायलट आनी हेर खलाशींच्या कामां संबंदीत नेमांत १ नोव्हेंबर सावन बदल केल्ले. हाका फ्लायट ड्यूटी टायम लिमिटेशन (एफडीटीएल) अशें नांव दिलें. हाका लागून इंडिगो विमान कंपनींत कर्मचार्यांचो उणाव जालो आनी ताका लागून हजारांनी विमान सेवा रद्द जाली. म्हूण हेर विमान कंपनींनी देशी विमानांचें भाडें ५० हजार रुपया मेरेन वाडयिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
