भांगरभूंय | प्रतिनिधी
भलायके विशीं पातळिल्ल्या वावड्यांक दिलो पुर्णविराम
पणजी : मुख्यमंत्री डॉ. प्रमोद सावंत हांणी आपले भलायकी विशीं पातळिल्ल्या सगल्या वावड्यांक पुर्णविराम दिला. आयज ते परत जनतेचे सेवे खातीर हाजीर रावले. पुण्याक रुबी हॉल क्लिनिकांत गरजेचे वैजकी उपचार आनी तपासण्यो पुराय करून मुख्यमंत्री काल रातीं उसरां गोंयांत परतले. विसव घेवपाचे सुवातेर तांणी आयज सकाळींच आपल्या सांखळे मतदारसंघांतल्या रवींद्र भवनांत आयोजीत ’जनता दरबार’त हाजेरी लायली. ह्या वेळार तांणी थळाव्या नागरिकांच्यो समस्या जाणून घेतल्यो आनी तांचे कडेन संवाद सादलो.
खाजगी कामा निमतान पुणे दौर्याचेर आसतना मुख्यमंत्र्यांक अचकीत भलायकेचो त्रास जाणवपाक लागिल्ल्यान तांकां बिरेस्तारा बेगोबेग हॉस्पिटलांत दाखल केले. डॉ. समीर शर्मा आनी नामनेचे काळजा रोग तज्ज्ञ डॉ. पुरवेझ ग्रांट हांच्या मार्गदर्शना खाला तांचेर विवीध वैजकी तपासण्यो केल्यो. राष्ट्रीय पांवड्यार कांय प्रसारमाध्यमांनी मुख्यमंत्र्यांचेर अँजिओप्लास्टी जाल्ल्याची बातमी दिल्ली, मात हॉस्पिटल प्रशासन आनी मुख्यमंत्री डॉ. सावंत हांणी हे खबरेक न्हयकारली. ही फकत एक ’नेमान भलायकी तपासणी’ आशिल्ली आनी सगले वैजकी अहवाल सामान्य आयल्यात, अशें तांणी स्पश्ट केलें. खंयचेय तरेची शस्त्रक्रिया जावंक नाशिल्ल्याचो व्हिडिओय हॉस्पिटलान जारी करून स्पश्टीकरण दिल्लें.
मजगतीं, १९ मार्चाक मुख्यमंत्रीपदाचीं सात वर्सां येसस्वीपणान पुराय करपी डॉ. सावंत हांणी गोंयांत परततांच कामाचो ताबो घेतलो. सोशल मिडियांत तांचे भलायकी विशीं सुरू आशिल्ल्या चर्चांक आयच्या जनता दरबारांत पूर्णविराम दिलो. म्हजी भलायकी आतां बरी आसा. काळजी करपाचें कसलेंच कारण ना, असो विस्वास तांणी ह्या वेळार जनतेक दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
