भांगरभूंय | प्रतिनिधी
हें आंतरराष्ट्रीय कायद्याचें उल्लंघन : रशिया
खबरां संस्था
तेलअवीव/तेहरान/वॉशिंगटन डीसी : अमेरिका- इझ्रायल आनी इराण हांचे मदल्या झुजाचो शेनवारा 22 दीस आशिल्लो. इराणाच्या तस्नीम खबरे संस्थे प्रमाण शेनवारा सकाळीं अमेरिका आनी इझ्रायलान इराणाच्या नतान्झ अणुउर्जा प्रकल्पाचे हवाई हल्लो केलो.
रशियेन ह्या हल्ल्याचो खर उतरांनी निशेध केला. रशियन विदेश मंत्रालयाची म्हणयारी मारिया झाखारोव्हा हांणी म्हणलां, हो हल्लो आंतरराष्ट्रीय कायद्याचें उल्लंघन आसा. इराणान लेगीत ह्या हल्ल्याची म्हायती आंतरराष्ट्रीय अणुउर्जा संस्थेक दिल्या.
मजगतीं, इझ्रायली सैन्यान (आयडीएफ) इराणाच्या नतान्झ अणुउर्जा प्रकल्पाचेर हल्लो केल्ल्याचें न्हयकारलां. आयडीएफान म्हणलां, हो हल्लो तांणी करूंक ना आनी तो कोणे केला तें तांकां खबर ना.
माध्यमांनी दिल्ले खबरे प्रमाण, ह्या हल्ल्यांत आतां मेरेन कसलेंच किरणोत्सर्गाची गळटी जावंक ना. वाठारांतल्या लोकांक कसलोच धोको ना.
इराणा वांगडा चालू आशिल्ल्या झुजांत आदार दिवंक नाशिल्ल्यान अमेरिकेचे राष्ट्राध्यक्ष डोनाल्ड ट्रम्प हांणी नाटो सांगाती देशांचेर नाराजी उक्तायल्या. ट्रम्प हांणी म्हणलां, नाटो देश भिवकुरे आसात आनी अमेरिके बगर ही युती फक्त कागदी वाग आसा. ट्रम्प हांणी होस्मुज स्टेटचो उल्लेख करून म्हणलां, तें उक्तें दवरचे खातीर लश्करी मजत दिवप सोंपे आसा, पूण सांगाती देश हातूंतल्यान फाटीं सरतात. ही खूब सोंपी लश्करी कारवाय आसा, जातूंत खूब उणो धोको आसा, पूण तांकां मजत करपाची ना. ते भिवकुरे आसात आनी आमी हें लक्षांत दवरतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
