भांगरभूंय | प्रतिनिधी
इडीसीचेर रु. १५.७ कोटी थकबाकीचो दोंगर
पणजी: सरकारची म्हत्वाकांक्षी मुख्यमंत्री रोजगार येवजणे खाला रीणवाटपान व्हडली मजल मारला आसली, तरी वसुलीच्या बाबतींत मात गंभीर तफावत उक्ती जाल्या. मेळिल्ले अधिकृत आकडेवारी प्रमाण, वट्ट रु. २४.६३ कोटींच्या रीणवाटप मदले चडांत चड १५.७१ कोटी रुपयांची रक्कम थकल्या. म्हळ्यार सुमार ६४ टक्के रीण अजून वसूल जावंक ना.
वित्त खात्यान जारी केल्ले गोंय अर्थीक उदरगत महामंडळ (इडीसी) अहवालात जारी केल्ले आकडेवरी प्रमाण २०२२२३ वर्सा वसुलीचो दर सुमार ५८% आशिल्लो, पूण २०२३२४ वर्सा तो ३८% मेरेन उणो जालो आनी २०२४२५ वर्सात तो फकत २२% मेरेन देंवला. रीण वाटपाचो वेग वाडला, तशी वसुलीची शिस्त इबाडत गेल्या, हें दिसून येता.
ह्या वसुल दर देवपा फाटल्यान मुख्यमंत्री रोजगार येवजना टर्म लोन २०२३ ह्या नव्या रीण घटकाचो व्हड वांटो आसा. ह्या एकाच वर्गांत रु. ८.०१ कोटींचे रीण वाटप जालां, तातूंतले रु. ६.७२ कोटी अजूनय थकल्यात.
ह्या रिणांचो चडसो वांटो पर्यटनाकडेन संबंदीत वेवसायांक खास करून पर्यटन टॅक्सी, मालवाहू वाहनां, ल्हान रेस्टॉरंट्स आनी सेवा व्यवसायांक जोडून आसा. गोयांत पर्यटन हंगामी आशिल्ल्यान ’ऑफ-सीझन’ आनी संवसारीक मंदीचो सरळ परिणाम रीणदारांच्या परतफेड करपाचे तांकीचेर जाला.
सबसिडी आशिल्ल्या रिणांची स्थितीय चिंताजनक आसा. मुख्यमंत्री रोजगार येवजण टर्म लोन (सबसिडी) आनी शेअर कॅपिटल (सबसिडी) ह्या वर्गांत दरेकी रु. २.७७ कोटी आनी रु. २.९० कोटी इतली थकबाकी आसा.
वर्स : वट्ट रिण – वसुली – थकबाकी
२०२२-२३ : ५.२१ – ३.०१ – २.२०
२०२३- २४: ९.८७ – ३.७८ – ६.०८
२०२४-२५ : ९.५४ – २.१२ – ७.४२
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
