भांगरभूंय | प्रतिनिधी
नवी दिल्ली: सर्वोच्च न्यायालयान शुक्रारा घटस्फोटाच्या प्रकरणांत म्हणलें, ‘‘बायल जेवण रांदिना वा घरांतलें काम सारकें करूंक कळना हें क्रुरपणां मानूंक जायना. तुमी वावराडे कडेन न्हय, जिणेंतल्या जोडीदारा कडेन लग्न जातात.’’
न्यायमुर्ती संदीप मेहता आनी न्यायमुर्ती विक्रम नाथ हांच्या खंडपीठान म्हणलें, ’’आतां काळ बदल्ला आनी घोवाकूय घरच्या कामांची बायले इतलीच जापसालदारी घेवची पडटली. आयच्या काळांत घोवानूय जेवण करचें आनी घरचीं कामं करचीं.’’
खंडपीठान ह्या प्रकरणांत निमाणो निर्णय दिवंक ना. फुडले सुनावणेच्या तारखेक घोव-बायलेक वयक्तीक तरेनहाजीर रावपाक सांगलां.
दोगांयचें लग्न ९ वर्सां आदीं जाल्लें, ८ वर्सांचो पुतूय आसा
दोगांचेंय लग्न २०१७ वर्सा जाल्लें आनी तांकां ८ वर्सां पिरायेचो चलोय आसा. घोव सरकारी शाळेंत शिक्षक आसा आनी बायल लेक्चरर आसा. युक्तिवादा प्रमाण, बायल अर्थीक नदरेन घोवा परस बरे स्थितीन आसा आनी तिणें आतां मेरेन कसलेच तरेची पोटगी वा भत्तो मागूंक ना.
घोवाचो आरोप आसा, लग्नाच्या एका सप्तका उपरांतूच बायलेची वागणूक बदल्ली. ती ताचे कडेन वायट वागपाक लागली आनी ताच्या आनी ताचे आवय-बापाय आड वायट शब्द वापरपाक लागली. ती घरांत जेवण करिना म्हणपाक लागली. घोवान अशेंय सांगलें, चल्याच्या जल्मा उपरांत जावपी बारश्याकूय ताका आपोवंक ना.
जाल्यार बायलेच्या म्हणण्या प्रमाण, चल्याच्या जल्मा उपरांत ती घोव आनी कुटुंबाच्या संमतीन तिच्या कुळारा गेल्ली. मात घोव आनी तिचे कुटुंबांतले कोणूच पुताच्या बारश्याक येवंक ना. बायलेन असोय आरोप केलो, ताच्या आवय-बापायन पयशे आनी भांगरा वस्ती मागल्यो आनी तिका तिचो पगारूय दिवपाक चेंपण हाडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
