बाबूश एक बापूय…

भांगरभूंय | प्रतिनिधी

राजकारणांतले आपले दीस उणे जातले तेन्ना आपले परस चड शिकिल्लो पूत रोहीत राजकारणांत जाय अशें बाबूशाक दिसल्यार अजाप नाका.

लेखाचो माथाळो वाचून लाखांनी बापूय, बाबूश म्हणटले आमीच ते. राग नाका, फोग नाका, मोग आसचो. आतां थांबप ना, फुडें वचपाचें.
ही काणी एका बापायची, गोंयचे कोयर वेवस्थापन मंत्री आतानासियो (बाबूश) मोंसेरात हांची. ते खोशी आसात, पूत रोहीत पणजे म्हापालिकेर वेंचून आयला म्हणून.
रोहीत वेंचणुकेच्या झुजांत देंवून, जिखूंक शकता हें बापूय बाबूशाक होलमलां. म्हापालिकेर 30 नगरसेवक वेंचून हाडपाचे दिकेन बाबूशाचीं पावलां पडटालीं. बाबूश हांचे लागीं मोबायलार अदीं मदीं मेसेजी वरवीं संपर्क आसता.
“भिवपाची गरज ना 30 नगरसेवक जिखून येतलेच. सत्तेंत 25 – 27, आसतले 2 – 4 विरोधी ”. म्हापालिका वेंचणुके आदीं हांवें बाबूशाक मेसेज धाडली. “ना, क्लीन स्वीप ” . तांची जाप. “क्लीन स्वीप ना, पांच ते दोन विरोधी वांगडी वेंचून येतलेच.” म्हजी मेसेज. “येस मॅडम”. चौकटी, चौकटींची तांची मेसेज.
क्लीन स्वीप लागीं पाविल्ल्यान बाबूश लिडर जाल्यात प्रदेश भाजपाचे. ताळगांव, पणजी, सांता क्रुझ अशा तीन मतदारसंघांतल्यान वेंचून येवपी बाबूश येता ते विधानसभा वेंचणुकेंत सांत आंद्रें मतदारसंघांचे उमेदवार जायत व्हय? पुताक वेंचून हाडपाचे तांचें सपन, एक खरें, पूत बाबूश न्हय पूण बापाय वरीं पुतान बंदखण भोगल्या. बापाय सारके पुताचेर आरोप जाल्यात. बाबूशाच्या दोळ्यांत दुकां पत्रकारांनी पळयल्यांत?
दुकां खोशेचीं, दुख्खाचीं.
बापूय बापूय जातात दादा न्हय. वेंचणुके वेळार पुताच्या, आपल्या आनी घरकान्नीच्याय. तशे ते मतदारांचे बापूय अडचणी वगतार. म्हजी आनी मंत्री बाबूश हांची वळख एका दुकानदारान पणजे करून दिल्ली, ताळगांवां ते पयले फावटी वेंचून आयले तेन्ना. सेकंदभर म्हजो विश्वास बसलो ना. फक्त हॅलो म्हळें. तांच्या पुताचेर आयिल्ल्या संकश्टांत दुकांनी भरिल्ल्या दोळ्यांचे बापूय बाबूश पळोवंक मेळ्ळे. त्या वेळार बाबूशाच्या घरा आदले मुख्यमंत्री चर्चील आलेमांव आशिल्ले.
ताळगांवांतलो काझा मोंसेरात बाबूश हांचो बंगलो, लागींच तांचेंच सानुलें घर. एका तेंपार तांच्या घरा वचपी पत्रकार तीन ते चार. आयज बाबूशाचें घर पत्रकारांक नवें नासतलें. राजकारणांतल्या व्हड घडणुकां वेळार बाबूश हांच्या घरा वचपाची संद म्हाका मेळ्ळ्या.
देशांतल्या व्हड टीव्ही चॅनेलान एक दीस रोहीताचेर जाल्ल्या आरोपांची, बंदखणीची हेडलायन साॅरी ब्रेक्रींग न्यूज केल्ली. कांय आमदारां वांगडा काझा मोंसेरात बंगल्यार एकलेंच पत्रकार म्हणून गेल्लें. रोहीताच्या ब्रेक्रींग न्युजाक जाप कशी दिवप ते बाबूश चिंतताले. “कितें करप?” बाबूशान म्हाका पळोवन, टीव्ही कडेन बोट दाखयत विचारलें. दोळ्यांत दुकां. “आतांच जाप कित्याक, पयलीं आदवोगाद सोदात, फुडलें फुडें.” हांवें सांगलें. तांगेर तेन्नाचे म्हापशेचें आमदार आदले उपमुख्यमंत्री अॅड. फ्रान्सीस डिसोझा (बाबूश) आयिल्ले. चर्चील, दोगूय बाबूश एकामेकां कडेन ल्हवू उलयताले. पत्रकार आसूनय म्हज्या हातांत मोबायल, पॅड, पेन नाशिल्लें. वर दोन वरां काझा मोंसेरातांत रावलें तेन्ना काझा मोंसेरात बंदखणी वरीं आशिल्ल्याचें कळ्ळें. तीन आमदार, तांचे तीन चार कार्यकर्ते टीव्हीच्या खबरांचेर नदर दवरून आशिल्ले. खबरी बेग्गीन दिवपाची गरज नाशिल्ली, खबरींचेर खबरी मेळोवपाचो तो तेंप. खबरींनी एक्सलुजीव न्यूज मेळटाली, बायलायन्स काणयो जाताल्यो.
ते दीस केन्नाच सोंपल्यात. रोहीत वेंचणूक जिखलो तेन्नाय बाबूशाच्या दोळ्यांत खोशेचीं ल्हारां न्हय दुकां हजारांनी लोकांक पळोवंक मेळ्ळीं. बाबूशाक बंदखणींत धाडपी आदले मुख्यमंत्री रवी नायक हांचे पूत रितेश नायक हांच्या प्रचारांत बाबूश आसतलेच. रोहीताच्या प्रचाराची दिका बापूय बाबूशाक फोंडें सावन मेळटली. शींव फाटल्यान, रितेश भिवचो ना.
राजकारण्यांक आपल्या पुता – धुवांक राजकारणांत हाडपाचो हावेस कित्याक आसचो न्हय? पयले फावटी रोहीताक बिनविरोध वेंचून हाडपी बाबूश, तांची घरकान्न जेनीफर सध्या धादोशी आसतली. बाबूश, जेनीफराक सूख, दुख कितें तें खबर आसा. अणभवान बाबूश खूब शाणे जाल्यात, “हल्ला बोल” ते करचे नात हो विस्वास प्रदेश भाजपाक आसा. देशांतल्या सगल्यांत व्हड राजकी पक्षाचो आपूण आमदार हाची जाणविकाय बाबूश हांकां आसा. जापसालदारकी सांबाळटना बापूय बाबूश कित्याक दिसचें न्हय? पिराय वाडटा, राजकारणांतले आपले दीस उणे जातले तेन्ना आपले परस चड शिकिल्लो पूत रोहीत राजकारणांत जाय अशें बाबूशाक दिसल्यार अजाप नाका.
बाबूश कॅलकुलेटीव, मोख दवरून वावुरपी राजकारणी. तांच्या घरा लांकडाचें सोबीत पोरणे फर्नीचर आसा. ओल्ड इज गोल्ड म्हापौर भाजपाचे तिसवाडीतले बापूय बाबूश हाडटले रोहीताक विधानसभेर धाडपा पासत.

सुहासिनी प्रभुगांवकार
9881099260