भांगरभूंय | प्रतिनिधी
काँग्रेसीचो राजेश वेरेंकार जाका सुमार सातशीं मतांनी हार खावची पडिल्ली तो मना काळजान भाटीकारा बराबर रावतलो काय?
वेंचणूक आयोगान फोंडेंची पोटवेंचणूक जाहीर केली आनी फाटले सुमार स म्हयने राजकी मळार दुकदूक आशिल्ली तिका रंग आयलो. गोंयचे मुखेल राजकी पक्ष लक्ष दवरून आशिल्ल्या प्रस्नाक वाचा फुटली. भारतीय जनता पक्ष (भाजप), काँग्रेस, महाराष्ट्रवादी गोमंतक पक्ष (मोगो), आम आमदी पक्ष (आप), रेव्हुल्युशनरी गोवन्स पक्ष (आरजी) आनी अपक्ष हांणी रणशींग बांदलें. पत्रकार आनी राजकी कार्यकर्त्यांच्यो हालचाली सुरू जाल्यो. अवघें वर्स लेगीत उरूंक ना फुडल्या विधानसभेच्या भौशीक वेंचणुकांक, तांतूंत ही वेंचणूक राजकी पक्षांक कितें तरी संकेत दिवंक शकता. दालें कोणाचें जड आसा? हाका सहज जाप मेळूं येता ती म्हणल्यार सर्गेस्त रवी नायकाचें राजकी अस्तित्व. कित्याक रवी नायक फोंडेंच्यान सुमार स फावटीं वेंचून आयला. आदीं मगो, काँग्रेस तिकेटींचेर आनी निमाणें फावटीं भाजपा तिकेटीचेर. हे फाटभुंयेर ही प्रतिश्ठीत वेंचणूक जाता, हाचेर पुराय गोंयचें लक्ष आसा.
भाजपाक संद चड आसा
भाजपा सत्तेर आसा आनी भोवमतान आसा. पक्षाच्या हायकमांडान रितेश रवी नायक हाचें नांव पक्षा वतीन जाहीर केलां. ते खातीर सर्गेस्त रवी नायकाचें राजकी मळ खोशेच्या नादार आसा. रवी नायक गेले उपरांत रोखडीच पक्षा वतीन रितेशाक तिकेट दिवची म्हूण मागणी जाताली कित्याक तो सक्रीय राजकारणांत आसा. ताणें फोंडें नगरपालिकेचें अध्यक्षपद पसून भुशयलां आनी तो आपल्या बापाय बराबर निश्ठेन वावुरतालो, लोका मदीं दिसतालो. ही एक कुटुंबीक राजकारणाची कुटनिती अशें पत्रकार दाखोवंक सोदतात ताका कांय मंत्र्यांनी रितेशाचो राजकी वावर फुडें घालून ताकाच ती खऱ्या अर्थान तिकेट फावता म्हूण रितेशाचें समर्थन केलां. रितेशा बराबर विश्वनाथ दळवी हाचेंय नांव पक्ष श्रेश्ठी कडेन धाडिल्लें, पूण भाजप संसदीय मंडळाचे बसकेंत रितेशाच्या नांवाचेर म्होर मारली आनी वेंचणुकेच्या कामाक अधिकृतपणान वावरूंक दारां उक्तीं केलीं.
मगोची भुमिका
फाटलीं कितलीशींच वर्सां मगो पक्ष भाजपा बराबर आसा. रवी नायका फाटल्यान ज्या कोणाक भाजप तिकेट दितलो ताका मगोन आपलो तेंको आसा अशें जाहीर केल्लें. मगोन इतलें पसून जाहीर केल्लें की, रितेशाक तिकेट दिल्यार आपलो पक्ष ताका तेंको दितलो. हाचे वेल्यान मगोन आपली भुमिका स्पश्ट केल्ली. फाटले विधानसभा वेंचणुकेंत मगो वतीन वेंचणूक लडयिल्ल्या दोतोर केतन भाटीकार हाका रवी नायका आड निसट्टी हार खावची पडिल्ली. ते खातीर जेन्ना मगो पक्षान आपलो तेंको भाजपाक जाहीर केलो तेन्ना दोतोर भाटीकार निरशेलो आनी ताणें मगो पक्षाक रामराम दिलो. आपूण बरी कामगिरी करतलों अशी दोतोराक आस्त आशिल्ली, पूण मगो पक्षान ताची हवाच काडून घेतली आनी ताका काँग्रेस पक्षान आपले वटेन ओडून घेतलो. इतल्यार तें सोंपलें ना, काँग्रेस पक्षान आपल्या बऱ्या उमेदवाराक फाटीं दवरून भाटीकाराक तिकेट दिली. काँग्रेसीचो राजेश वेरेंकार जाका सुमार सातशीं मतांनी हार खावची पडिल्ली तो मना काळजान भाटीकारा बराबर रावतलो काय? हांगा मगो पक्ष खुशाल आसतलो.
रवी नायकाची कामगिरी
रवी नायकान पयले फावटी 1984 वर्सा मगोचे तिकेटीचेर विधानसभा वेंचणूक जिखिल्ली. त्या वेळार ताका नामनेचो व्हॉलिबॉल खेळगडो म्हूण वळखताले. 1989 वर्सा ताणें मडकय मतदारसंघांतल्यान मगो पक्षाचे तिकेटी वेल्यान जैत मेळयलें. मागीर ताणें मगो पक्ष सोडलो आनी काँग्रेसींत प्रवेश घेतलो आनी 1999, 2002 आनी 2007 अश्या सेगीत तीन विधानसभा वेंचणुकांनी फोंडे मतदारसंघांतल्यान काँग्रेस पक्षाचे तिकेटीचेर जैत मेळयलें. ह्याच काळांत तो गोंय राज्याचो मंत्री आनी मुखेलमंत्री लेगीत जालो. 2012 वर्सा ताका मगोच्या लवू मामलेदारा कडल्यान हार खावची पडली पूण 2017 वर्साचे वेंचणुकेंत ताणें काँग्रेसीचे तिकेटी वेल्यान फोंडें मतदारसंघांतल्यान परतून खातें उगडलें. 2022त मात ताका दोतोर भाटीकारा आड सामकें निसट्टें जैत मेळ्ळें. मतमेजणी सोंपली तेन्ना रवीबाब हारलो म्हूण पसून जाहीर जालें. पूण परतून मेजणी केले उपरांत ताका फक्त 77 मतांची आघाडी मेळ्ळी. कितेंय आसूं, रावी नायकान फोंड्यां सगल्यां परस चड फावटीं वर्चस्व दाखयलां, तांतूंत ताच्या भुरग्यांचोय हातभार आसा. म्हणून तर ताच्या पुताक रितेशाक तिकेट दिवन भाजपान ताच्या कार्याचो मान राखला.
वास्तवीक समिकरणां
वेंचणूक प्रक्रिया सुरू जायत मेरेन फोंडेंच्या मतदारां मदीं नवी उमेद पळेवंक मेळ्ळ्या. फाटलीं चार वर्सां शांत आशिल्लो मतदार नवे उमेदीर आयिल्लो दिसला. सामान्य मनीस वेंचणुकेच्यो गजाली करूंक लागला. गांवगिऱ्या वाठारांतले आनी नगरपालिका वाठारांतले फुडारी क्रियाशील जावंक लागल्यात. एप्रीलाचे णव तारखेर वेंचणूक म्हणल्यार 18-19 दीस उरल्यात. रितेश नायकाक हें एक व्हड आव्हान आसा, तरी ताचे फाटल्यान रवीबाबाची सहानुभुती चलून येतली. तेच बराबर मगो पक्षान आपलो राजकी सांगाती म्हूण भाजपाक आदींच तेंको दिल्लो आसा. काँग्रेस पक्ष आनी दोतोर केतन भाटीकार ही वेंचणूक कितले गंभीरतायेन घेता हाचेरूच तें सगलें निंबून आसा. ताचे बराबर आप आनी आरजी पक्ष आपलें अस्तित्व दाखयतलेच.
सोंपयतना…
भाजपाचो अध्यक्ष दामू नायकाचें मुखामळ बरेंच खोशी दिसता. तो आपल्या पक्षाक योग्य मार्गदर्शन करतलोच पूण तेच बराबर ताच्या पक्षांतले फुडारी फोंडें मतदारसंघांत कितलो वावर करतात ताचेरूय सगल्यांची नदर आसा. ह्या निकाला वेल्यान फोंड्यां खंयचो पक्ष जैत जोडटा, ताचेर मुखा वेली विधानसभा वेंचणूक भाजपाचो फुडार पळेतली. सध्या पसून भाजपाचें दालें जड आसा आनी रितेश नायकाक फक्त सहानुभुतीन न्हय तर ताच्या खासगी वावरा वेल्यानूय वळखतात, हाचो ताका फायदो जातलो. तरी पळेवया, वेंचणूक ती. मतदार राजा.
विन्सी क्वाद्रूस
9822587498
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
