भांगरभूंय | प्रतिनिधी
पणजी : रानटी जनावरांच्या उपद्रवाक लागून गोंयांत अनसाच्या पिकाक बरोच मार बसला. फक्त दोन विभागीय शेतकी वाठार सोडल्यार हेर विभागीय शेतकी वाठारांनी रानवटी जनावरांनी पीक मस्तिल्ल्यान अनसाचें पीक सामकेंच उणें जायत चल्लां, अशी म्हायती शेतकी संचालनालयान दिल्या.
संचालनालयान जारी केल्ले आंकडेवारी प्रमाण गोंयांत 234 हॅक्टर जमनीत अनस पिकता. तातूंतली 66 टक्के पिकावळ ही फोंडें म्हालांत जाता. पूण हे पिकावळीचेर सध्या रानवटी जनावरांनी अरिश्ट हाडलां. फक्त सांखळी आनी दिवचल ह्या दोन विभागीय शेतकी वाठारांनी अनसाची पिकावळ वाडटा. जाल्यार हेर वाठारांनी ही उणी जाता. फक्त म्हापशें आनी तिसवाडी वाठार सोडल्यार हेर सगल्या वाठारांनी अनसाचें पीक जाता.
मुरगांवां 3 हजार चौ. मि. जमनींत अनसाचें पीक जाता आनी ही पिकावळाची खेतीं वाट लायतात. केपें 7906 चौ. मि. अनासाची पिकावळीचेर खेतीं आनी साळ हीं रानवटी जनावर घोस्त मारतात. सत्तरींत 2 हॅक्टर जमनींत जावपी पिकावळीचें रानदुकर आनी खेत्यांनी केल्ले लुकसाणीक लागून पिकावळींत उणाव जाता. ही जनवरां सदांच शेतांनी घुसून पीक मुळां सकट काडून उडयता आनी जेन्ना फळ धरता तेन्नाच तें फळाचें लुकसाण करतात. हाका लागून शेतकारांचे पिकावळीक आनी येणावळीक बरोच मार बसला.
धारबांदोड्यां 16 हॅक्टर अनसाची पिकावळ तयार जावचे पयली तांचें गवो, रानदुकर आनी खेत्यांनी लुकसाण केलां. जाल्यार सांग्यार 32 हॅक्टर अनसाचे पिकावळीचेर रानवटी जनावरां आनी हवामान बदलाचो परिणाम जाला. मडगांव 3800 चौ. मि. पिकावळी खेती आनी साळींनी मस्तून उडयल्यात. फोंड्यां 155 हॅक्टर पिकावळ रानवटी जनावरांच्या उपद्रवाक लागून धोक्यात आयल्या. जाल्यार काणकोणां 15 हॅक्टर जमनींत अनस पिकता. पूण रानवटी जनावरां हें पीक मस्तून उडयतात ताका लागून शेतकार नवे पीक घेवपाक सोदिनात. मजगतीं, पेडणें वाठारांत 4 हॅक्टर जमनींत अनस पिकता. थंय अनसाचे पिकावळींत कसलोच उणाव नोंद जावंक ना. पूण रानवटी जनावरांच्या उपद्रवांक लागून पिकावळींत कसलीच वाड जायना. जाल्यार सांखळी वाठारांत अनसाचें उत्पादन कशेंच उणें जावंक ना आनी दिवचल वाठारांत 2020-21चे तुळेंत 2025-26 त अनसाचे पिकावळींत ल्हवू ल्हवू वाड नोंद जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
