भांगरभूंय | प्रतिनिधी
लिटरा फाटल्यान 2.35 रुपयांची वाड
अमेरिका – इझ्राय- इराण झुजाचो परिणाम
सामान पेत्रोल मेळटलें आदल्याच मोलान
खबरां संस्था
नवी दिल्ली : सरकार तेल कंपन्यांनी स्पीड आनी पॉवर सारक्या प्रिमियम पॅत्रोलाचें मोल शुक्रारा 2.09 ते 2.35 रुपया दर लिटरा फाटल्यान वाडयलें. अमेरिका- इझ्रायल आनी इराण झुजाक लागून कच्च्या तेलाचें मोल वाडिल्ल्यान ही वाड केल्या. ही वाड वेगवेगळ्या राज्यांनी आनी शारांनी वेगवेगळी आसूं येता. प्रिमियम पॅत्रोलाचें वाडिल्लें मोल तत्काळ प्रभावान लागून जाल्ल्याचें मानतात.
प्रिमियम पेत्रोल ‘बीपीसीएल’चें स्पीड, ‘एचपीसीएल’चें पॉवर आनी ‘आयओसीएलचें एक्सपी95 ह्या नांवान विकतात. जाल्यार सामान्य पेत्रोल आदल्याच मोलान मेळटलें. सध्या तांच्या मोलांत कसलोच बदल जावंक ना.
प्रिमियम पॅत्रोलाचें मोल वाडपा फाटलें मुख्य कारण म्हणल्यार आंतरराष्ट्रीय बाजारांत कच्च्या तेलाच्या मोलांत जावपी चड- उतार आनी प्रिमियम इंधनांत मिस्तुराद करतात त्या अॅडिटीव्हजचें वाडिल्लें मोल हें मानतात. सामान्य पॅत्रोलाचे तुळेंत तें आदींच 5 ते 10 रुपया म्हारग आसता. आतां हे वाडी उपरांत हो फरक आनीक वाडटलो.
सामान्य लोकां खातीर थाकाय दिवपी गजाल म्हणल्यार, बेस इंधन म्हणल्यार सामान्य पेत्रोल आनी ढिजॅलाच्या मोलांक हात लावंक ना. तेल कंपन्यांनी निमाणें मार्च 2024 त सामान्य पेत्रोल- डिझॅलाच्या मोल 2 रुपयांनी उणें केल्लें. प्रिमियम इंधनाची विक्री वट्ट पेत्रोल विक्रीचो एक ल्हानसो वांटो आसता, ताका लागून हे वाडीचो परिणाम जांचे कडेन लक्झरी मोटार वा हाय- परफॉर्मन्स स्पोर्ट्स बायक आसात अश्या लोकांचेर चड जातलो.
भारतांत कच्चें तेल 146 डॉलरांचेर
भारतांत कच्च्या तेलाचें मोल सुमार दुपेट जावन 146 डॉलरांचेर पावलां. भारत इराक, सावदी अरब, रशिया, यूएई कडल्यान तेल खरेदी करता. ह्या सगल्या वेगवेगळ्या तरांच्या तेलांच्या मोलांची जी सरासरी काडटात ताकाच ‘इंडियन बास्केट’ म्हणटात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
