भांगरभूंय | प्रतिनिधी
चेन्नयः तमीळ लेखक, वाचक, समाजीक वावुरप्यांच्या समुहान कवी वैरमुथू हांकां जाहीर जाल्लो ज्ञानपीठ पुरस्कार बेगोबेग फाटीं घेवपाची मागणी केल्या.
सुमार 230 व्यक्तींनी सय केल्ल्या ह्या पत्रांत लेखक अंबाय, कवी सुकुमारन, अभिनेत्री रोहिणी ह्या नामनेच्या व्यक्तींचो आस्पाव आसा. अशा व्यक्तीक हो पुरस्कार दिल्यार फुडाराक पुरस्काराची विस्वासार्हता आनी प्रतिश्ठा उणी जावपाचो धोको आसा, अशें पत्रांत स्पश्ट केलां.
पत्रांत म्हणलां: “वैरमुथू हाचें बरप तमीळ समाजांतल्या मुळाव्या मुल्यांचें वा संस्कृतीक अभिमानाचें प्रतिनिधित्व करिना. ताची साहित्यीक अस्मिताय फक्त उतरांच्या अलंकारीक मांडणेचेर आदारून आसता आनी लोकांची खरी भावना तातूंत व्यक्त जायना. अश्या वेवसायीक लेखकाक इतलो व्हड मान दिवप म्हणल्यार खऱ्या साहित्य कलाकारांचो अपमान.”
ह्या समुहान असोय युक्तिवाद केला की सर्वोच्च पांवड्या वेलो साहित्यीक भोवमान दितना व्यक्तीची भौशीक जीण आनी नैतीक प्रतिश्ठा विचारांत घेवंक जाय. ते भायर #MeToo चळवळी वेळार सुमार 18 बायलांनी वैरामुथूचेर लैंगीक छळाचे आरोप केल्ले हाचे कडेन ह्या पत्रांत लक्ष ओडलां.
निवेदना प्रमाण अशा आरोपांक सामकार वचपी मनशाक इतलो प्रतिश्ठीत भोवमान दिवप हें समकालीन समाजीक मुल्यांचो, चड करून लैंगीक न्यायाचेर केंद्रीत आशिल्ल्या मुल्यां आड आसा. तशेंच ह्या गीतकाराच्या भौशीक भाशणांत पितृसत्ताक दृश्टीकोन दिसून येता असो आरोपूय केला.
सय करप्यांनी केरळ सांस्कृतीक अकादमी कडेन संबंदीत एका पयलीच्या वादाचो संदर्भ दिला, ज्या अकादमीन ह्याच आरोपां वेल्यान जाल्ल्या व्यापक विरोधा उपरांत वैरामुथू हांकां ओएनव्ही साहित्य पुरस्कार दिवपाचो आपलो निर्णय फाटीं घेतिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
