भांगरभूंय | प्रतिनिधी
मुंबयः देशांतल्या तीन मुखेल कंपनींक 2,200 कोटी रुपयां परस चड जीएसटी वसुली खातीर नोटीस धाडल्या. डेल्टीन कॅसिनोची कंपनी डेल्टा कॉर्पाक 1,752.4 कोटी रुपयांची जीएसटी वसुली नोटीस जारी केल्या. ही नोटीस कर कमी भरल्या खातीर धाडल्या. डेल्टाची उपकंपनी हायस्ट्रीट क्रूझेस अँड एंटरटेनमेंटाचोय हातूंत आस्पाव आसा. फिजिक्सवाला लिमिटेडाक आयकर कायद्याच्या कलम 143 (3) खाला 263.34 कोटी रुपयांची कर वसुली नोटीस जारी केल्या.
देशांतल्या ह्या तीन मुखेल कंपनींक 2,200 कोटी रुपयां परस चड जीएसटी वसुली खातीर नोटीस जारी केल्यान कॉर्पोरेट मळार बोवाळ पडला. डेल्टा कॉर्प लिमिटेड, तमिळनाड मर्कंटायल बँक आनी फिजिक्सवल्ला लिमिटेड हांकां आयकर आनी जीएसटी विभागान वेगवेगळ्या कारणांक लागून हे व्हड रकमे खातीर नोटीस जारी केल्या.
डेल्टा कॉर्प लिमिटेडाक 2023-23 अर्थीक वर्सा खातीर 1,752.4 कोटी रुपयांची जीएसटी थकबाकी संबंदीत नोटीस मेळ्ळ्या. ही नोटीस कंपनीक आनी तिची उपकंपनी हायस्ट्रीट क्रूझेस अँड एंटरटेनमेंट प्रा. लिमिटेडाक दिल्या. “ग्रॉस बेट व्हॅल्यू” हाचेर आदारीत कर घेतला असो दावो केला. पूण ही मनमानी आनी कायद्या आड आसा अशें सांगून कंपनीन न्यायालयांत वचपाचो निर्णय घेतला. हाचे आदीं जुलय 2017 ते मार्च 2022 ह्या काळांत सर्वोच्च न्यायालयान अशाच नोटीसींक स्थगिती दिल्ली.
मजगतीं, तमिळनाड मर्कंटायल बँकेक मूल्यांकन 2013-14 वर्सा खातीर 204.23 कोटी रुपयांची कर वसुलीची नोटीस जारी केल्या. आयकर कायद्याच्या कलम 36 (1) (1) (viia) खाला केल्ले दावे न्हयकारून ही नोटीस जारी केल्या. ह्या निर्णया आड अपील करपाची प्रक्रिया बँकेन सुरू केल्या.
फिजिक्सवाला लिमिटेड कंपनीक मूल्यांकन 2023-24 वर्सा खातीर 263.34 कोटी रुपयांची कर वसुलीची नोटीस धाडल्या. कंपनीक मेळिल्ली गुंतवणूक करपात्र उत्पन्न मानून ही कारवाय केल्या. कंपनीन ह्या प्रकरणांत कायदेशीर कारवाय करपाचें थारायलां. वेवसायाचेर कसलोच व्हडलोसो परिणाम जावचो ना असो विस्वास उक्तायला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
