भांगरभूंय | प्रतिनिधी
दोन दिसांत विशय सुटावो करपाचे दामू हांचें आश्वासन
पणजीः सांवड्डेंतल्या मिराबागच्या जुवारी न्हंयेचेर प्रस्तावीत बांदा आड आंदोलन करप्यांनी भाजपाचे प्रदेशाध्यक्ष दामू नायक हांकां मेळून तांकां निवेदन सादर केलें. दोन दिसां भितर हो प्रस्न सुटावो करपाचे आश्वासन प्रदेशाध्यक्ष दामू नायक हांणी दिल्ल्याचें आंदोलन करप्यांनी सांगलें.
भाजपाचे प्रदेशाध्यक्ष दामू नायक हांकां निवेदन दिले उपरांत आंदोलन करप्यांनी मिराबाग हांगा जुवारी न्हंयेचेर बांद बांदल्यार ताचो पर्यावरणाचेर जावपी परिणाम आनी ताचो थळाव्यांचेर कसो परिणाम जातलो हाची म्हायती दिली.
मागण्यांची दखल घेवन बेगीनांत बेगीन उपाय सोदून काडपाचे आश्वासन दामू नायक हांणी दिले. दोन दिसां भितर हो प्रस्न सुटावो करपाचे यत्न करतले अशेंय दामू नायक हांणी सांगलें.
फाटल्या कांय म्हयन्यां सावन आंदलोन सुरु
मजगतीं फाटल्या कांय म्हयन्यां सावन थळावे लोक एकठांय येवन मिराबाग हांगा प्रस्तावीत बांदा आड आंदोलन करतात. निदर्शनां, मोर्चा, निशेध रॅली काडून तांणी ह्या प्रकल्पा आड आवाज काडलो. हालींच जाल्ल्या विधानसभा अधिवेशनांत कांय लोक बांदा आड तकटे घेवन गॅलरींत पावले. ह्या प्रकरणांत चार जाणांचेर केस नोंद जाल्ली. तशेंच मडगांवच्या लोहिया मैदानाचेर तांणी आंदोलन केले. परवानगी नासतना आंदोलन केल्ल्यान पुलिसांनी तांकां पुलीस स्टेशनांत व्हेले. तांणी थंयच बसून आंदोलन केले. मिराबाग बांद प्रकल्प रद्द जाले बगर आंदोलन फाटीं घेवचे नात अशी शिटकावणी आंदोलकांनी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
