भांगरभूंय | प्रतिनिधी
मागीर अशें कित्याक घडलें? कारण घरांतल्या झाडाक गरजे परस चड उदक पडलें आनी ताचीं मुळां कुसलीं.
आपल्या पुताचो खून करून बापायन स्वता आत्महत्या केल्ल्याची एक दुखदिणी घडणूक ह्याच सप्तकांत आमच्या सुशिक्षीत, सुसंस्कारी गोंयांत घडली. अश्यो घडणुको अदींमदीं घडटात तेन्ना संवेदनशील मनाक यातना जातात. आपणे जल्म दिल्ल्या भुरग्याचो जीव घेता मेरेन बापूय- पुता मदलें नातें कितलें ताणिल्ल्लें आसतलें हाची कल्पना केल्यार रक्ताच्या वा मानिल्ल्या नात्यां मदली शेणत चलिल्ली संवेदनशिलताय लक्षांत आयले बगर रावना.
नातीं तिगतलीं आनी घटमूट उरतलीं जाल्यार सगल्यांत म्हत्वाचें ती एकामेकां मदली समजिकाय आनी खर विस्वास. एकामेकांची विचारसरणी, भावभावना, जिणेशैली जाणून आनी मानून घेवप. आपलीं मतां दुसऱ्याचेर थापचे परस दुसऱ्याच्या मतांचो आदर करप. दुसऱ्याचीं मतां चुकता अशें दिसल्यार ताच्या मतांचो आदर दवरून ताचेर चर्चा करप. दुर्दैवान हें चित्र आमकां हालीं सपासप दिसना. कृत्रीम बुद्धिमत्तेच्या युगांत आमच्यो संवेदनाय कृत्रीम जावंक लागल्यात काय हो हुस्को सदांच पावला कणकणी जाता.
गोंयांत घटस्फोटाच्यो केसी दिसपट्ट्यो व्हडा संख्येन वाडटात म्हणपाचें हालींच एक आदवोगाद इश्ट सांगतालो. लग्नाक पस्तीस वर्सां जाल्लीं जोडपीं लेगीत घटस्फोट घेवपाक अर्ज करतात म्हणपाचें ताणे सांगलें. पस्तीस वर्सां संवसार केल्या उपरांत वेगळीं जावपाचो विचार मनांत येवचो? तशें जाल्यार लग्ना उपरांतच्या पस्तीस वर्सांच्या काळांत कसलें नातें ताणी एकामेकांच्या काळजांत जपलें तर? साद्या साद्या कारणांक लागून आयज घटस्फोटाच्या निर्णया मेरेन लोक पावतात. हांतूंत मुखेलपणान शिक्षीत आनी अर्थीक नदरेन गिरेस्त घरांतल्या तरण्या जोडप्यांचो आसपाव आसता. ह्या सगल्यांचो परिणाम भुरग्यांच्या मानसीक घडपाचेर जाता. तीं शाळेंत येतात वा समाजांत वावुरतात तेन्ना प्रचंड दडपणांत आसतात म्हणपाचें तांच्या वागपावेल्यान होलमता.
शासनान शाळांनी समुपदेशकांची नियुक्ती केल्या. सप्तकांत एक वा दोन दीस हे समुपदेशक दरेके शाळेंत वचून भुरग्यांचे मानसीक आनी भावनीक प्रस्न जाणून घेवन तांच्यो जापो सोदपाचो यत्न करतात. वास्तवीक, दरेके शाळेंत पुराय वेळ समुपदेशकाची नियुक्ती जावपाची गरज आसा. लागीं लागीं दरेक भुरगो आयज मानसीक आनी भावनीक प्रस्नांचें ओजें भुजांर घेवन वावुरता. ताचो घुस्मट आयकुपी कान आयज ना जाल्यात. पालक, समाज, इश्ट, सोयरीं सगलींच भेड्डीं जाल्यांत. तांचीं मनां भेरेल्यांत.
संवसारांतल्या खंयच्या तरी अनवळखी वाठारांत एखादी वायट गजाल घडली जाल्यार आमी कळवळटाले. आयज आमकां शेजराक, आमचे सरभोंवतणी लेगीत घडपी अश्या घडणुकांनी दुख्ख जायना. दरेकलो आपले पुरतें चिंतपाक लागला. स्वताच्या भुरग्या खातीर लेगीत चिंतपाक आवय बापाय कडेन वेळ नासता.
एका काळार घरांत पुराय परिवार एकठांय रावतालो. सांजवेळां प्रार्थना जाताल्यो. भुरगीं आपल्या इश्टां वांगडा पुराय सांजवेळ खेळपाक रमतालीं. जेवणार बशिल्ले कडेन खबरो जाताल्यो. आतां फकत हातांत मोबायल आनी मोबायलाचेर अती आक्रमकतायेचे, पोजडेपणांनी, दुस्वासान भरिल्ले वेब सिरीज आनी युट्यूब व्हिडियो. भुरग्यांक पांच स वर्सां पिरायेचेर हें मनमारें यंत्र आवय बापायच्या माध्यमांतल्यान हातांत मेळटा. भुरगीं मोबायलाचेर कसलो कंटेंट पळयतात हाचेर लक्ष दवरपाक आवय बापायक वेळ आसूंक जाय न्ही? चवथी पांचवी यत्तेच्या भुरग्यांच्या तोंडांत सहजपणान घोळपी पोजड्यो गाळयो आनी आक्रमक भास, आमकां तांच्या घडट्या मनार जावपी संस्कारांची वळख दिता.
आपलीं भुरगीं आपल्याक मारतात म्हणपाच्यो कागाळी एक शिक्षक म्हूण जेन्ना हांव पांचवी सवी यत्तेंत शिकपी विद्यार्थ्यांच्या पालकां कडच्यान आयकतां तेन्ना म्हाका त्या पालकांची काळकूट दिसता. भुरगीं आवयच्या पोटांतल्यान जल्म घेतनाच अशीं आक्रमक म्हूण जल्माक येनात. मागीर तांचे मदीं ही इतली आक्रमकताय आनी असंवेदनशिलताय येता म्हणसर पालक ओगी कित्याक रावतात.
भुरग्यांची कुयदाद फुलांच्या झाडावरी जावंक जाय. झाडांर बरीं रंगरंगयाळीं, परमळान भरिल्लीं फुलां फुलतलीं जाल्यार तांकां जाय तितलेंच सारें- उदक मेळपाक जाय. फाटी एके नर्सरींत गेल्ले कडेन दोन ल्हानशींच झाडां विकतीं घेतलीं. एक घरांत दवरलें आनी एक म्हज्या स्कुलांतल्या म्हज्या मॅजार दवरलें. घरांत दवरिल्ल्या झाडाक हांव हात सोडून उदक घालतालों. स्कुलांतल्या झाडाक मेजकेंच उदक घालतालों कारण चड उदक घाल्यार तें कुंडेंतल्यान मॅजार देंवन येतालें आनी मॅजावेल्यो वस्ती भिजताल्यो. कांय दिसांनी घरांतलें झाड बावलें आनी सुकून गेलें. स्कुलांतलें झाड मात्त वाडत गेलें. एकेच तरेची दोन झाडां. मागीर अशें कित्याक घडलें? कारण घरांतल्या झाडाक गरजे परस चड उदक पडलें आनी ताचीं मुळां कुसलीं. स्कुलांतल्या झाडाक जाय तितलेंच उदक मेळ्ळें आनी तें व्हड जायत गेलें. भुरग्यांक आमी सर्वांगान वाडयतलीं जाल्यार तांकां संतुलीत वातावरणांत वाडोवचें पडटलें.
आवयन वा बापायन भुरग्याचो जीव घेवप तशेंच भुरग्यान आवय बापायचो जीव घेवपाच्यो घडणुको अपवादान घडटात जाल्यार समजूं येतालें. त्यो आतां सपासप घडपाक लागल्यात. वाडटो अहंकार, उणो जाल्लो संयम, समजिकायेचो अभाव आनी समाज माध्यमांचो प्रचंड नकारात्मक प्रभाव हाका लागून पालक भुरग्यांचें नातें लेगीत दुशीत जावपाक लागलां म्हणपाची खंत दिसता.
अश्यो घडणुको घडटात तेन्ना आमी कांय खीण दुखेस्त जातात आनी कालांतरान विसरूनय वतात. घडणूक ज्या घरांत घडल्या त्या घरांतलें वातावरण, घरच्यांची मनस्थिती आनी घडणुके उपरांतची परिस्थिती हाचो आमी विचार करिनात. ताका लागून प्रस्नाची जाप आमकां मेळपाकच पावना. आमकां आतां असल्या खबरांची संवय जाल्या. आमच्या मनांचेर आतां असल्या दुखदिण्या गजालींचो व्हडलोसो परिणाम जायना. आमचीं मनां भेरेनात. कारण आमचीं मनां आमी घाणाक दवरल्यांत- धांवत्या आनी आप मतलबी तत्वा कडेन!
अनंत अग्नी
9422439903
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
